काठमाडौं । प्रदेश सरकारलाई संघीयताको मर्मअनुसार अधिकार हस्तान्तरण नगरिएको भन्दै रुष्ट प्रदेशका मुख्यमन्त्रीहरुले प्रधानमन्त्री प्रचण्डलाई भेट गरेका छन् ।
मुख्यमन्त्रीहरुले आज बिहान प्रधानमन्त्रीलाई भेटेर संघीयता कार्यान्वयन गराउन ध्यानाकर्षण गराएका छन् । मुख्यमन्त्रीहरुले संघीयता कार्यान्यन गर्न र सविधान बमोजिम प्रदेश सरकारलाई अधिकार दिन प्रधानमन्त्रीलाई आग्रह गरे ।
शुक्रबार मात्रै हेटौंडामा बसेको मुख्यमन्त्रीहरुको बैठकले प्रधानमन्त्रीलाई संघीयता कार्यान्वयनका लागि ध्यानाकर्षण गराउने निर्णय गरेको थियो ।
भेटमा हेटौँडा बैठकले गरेको ९ बुँदे निर्णय र पोखरा बैठकको निर्णयबारे प्रधानमन्त्रीलाई जानकारी गराइएको छ । उनीहरुले निजामति कर्मचारी ऐन, प्रहरी समायोजन ऐन, शिक्षा ऐन, जग्गा प्राप्ति ऐनको अभावमा काम गर्न नसकेको जनाएका छन् ।
मुख्यमन्त्रीहरूले नेपालको संविधानमा व्यवस्था भएका साझा अधिकार सूचि प्रयोगको व्यवस्था मिलाउन, गत असारमा पोखरामा सम्पन्न मुख्यमन्त्री सम्मेलनको निष्कर्ष कार्यान्वयन गर्न सरकारको ध्यानाकर्षण गराएका हुन् ।
मुख्यमन्त्रीहरूले सङ्घीयता कार्यान्वयनका लागि आवश्यक कानुन निर्माण नेपाल सरकारको मात्र एकल दायित्व नभएर सङ्घीय संसद र राजनीतिक दलहरूको साझा दायित्व भएकोमा जोड दिँदै राजनीतिक सहमतिका लागि प्रधानमन्त्रीले समन्वय गर्नुपर्ने जोड गरे।
भेटमा सदुरपश्चिम प्रदेशका मुख्यमन्त्री भने सहभागी भएनन् । उनी कार्यव्यतताका कारण काठमाडौँ नआएको बताइएको छ ।
प्रतिक्रिया