काठमाडौं । पटक पटक मापदण्ड विपरित औषधि उत्पादन गर्ने एक औषधि कम्पनीलाई औषधि व्यवस्था विभागले मापदण्ड विपरितका औषधि बिक्री वितरणमा रोक लगाएको छ । केहीदिन अगाडी मापदण्ड विपरितको प्यारासिटामोल उत्पादन गरेको लोमस फार्मास्युटिकल्स प्रालिले उत्पादन गरेको ओनो सिरप नाम गरेको औषधि पनि मापदण्ड विपरितको पाइएपछि औषधि व्यवस्था विभागले बिक्रीमा रोक लगाएको हो ।
ओनो सिरप नामको औषधिको बजारबाट नमुना ल्याएर परीक्षण गर्दा मापदण्ड अनुसार नपाइएको विभागको सूचनामा उल्लेख छ ।
बजार अनुगमनका क्रममा ल्याइएको ओएलएसओ-१२३ ब्याचको नमूना राष्ट्रिय औषधि प्रयोगशालाम परीक्षण गर्दा मापदण्ड अनुसार नपाइएको विभागले जनाएको छ । परीक्षणमा मापदण्ड अनुसार नभएकै कारण सो औषधि बिक्रीमा रोक लगाइएको हो ।
उक्त औषधि वाकवाकी र उल्टीको रोकथामका लागि प्रयोग गरिन्छ । विभागले गत साता पनि लोमसले उत्पादन गरेको सेटोफेन (प्यारासिटामोल) ट्यावलेटको सीटी – २०२३ ब्याचको औषधि पनि ‘डज नट कम्प्लाइ’ भन्दै बजारबाट फिर्ता (रिकल) गर्न निर्देशन दिएको थियो ।
विभागले ओनो सिरपको ‘लिकेज’को सम्वन्धमा जाँचबुझ प्रतिवेदन सहित उद्योगको मुख्य प्राविधिकलाई १५ दिन भित्र विभागमा उपस्थित हुनका लागि समेत निर्देशन दिएको छ ।
प्रतिक्रिया