काठमाडौं । संसद भवनको सुरक्षा व्यवस्था कायम गर्न नसकेको अभियोगमा प्रहरी प्रधान कार्यालयले संसद भवनमा सुरक्षार्थ खटिएको प्रहरी युनिटलाई जिम्मेवारीबाट हटाएको छ ।
सोमबार दिउँसो लघुवित्तका ऋणी आन्दोलनकारीहरु निषेधित क्षेत्र पार गरेर नयाँ वानेश्वरस्थित संसद् भवन परिसरभित्र प्रवेश गरेका थिए । त्यसलगत्तै प्रहरी प्रधान कार्यालयले संसद् भवनको सुरक्षार्थ खटिएका प्रहरी निरीक्षकसहितको ३२ जनाको टोलीलाई जिम्मेवारीबाट हटाएको हो । सो टोलीलाई हटाएलगत्तै अर्को टोली परिचालन गरिसकिएको छ ।
घटनाबारे छानबिन गर्न उपत्यका प्रहरी कार्यालय, रानीपोखरीले एसएसपी दिनेशराज मैनालीको नेतृत्वमा ३ सदस्यीय छानबिन समिति बनाइएको छ । समितिमा काठमाडौं प्रहरीका एसपी नवराज अधिकारी र उपत्यका प्रहरी कार्यालय, रानीपोखरीका डीएसपी दिनेश घिमिरे सदस्य छन् ।
घटनाबारे गृहमन्त्री नारायणकाजी श्रेष्ठले तीन वटा सुरक्षा निकायका प्रमुखहरुसँग जानकारी माग गरेका छन् ।
प्रतिक्रिया