मधुवनमा एकीकृत पाठ्यक्रम र गुणस्तरीय शिक्षाको महत्व बारे कार्यशाला

बर्दिया । एकीकृत पाठ्यक्रम र गुणस्तरीय शिक्षाको महत्व बारे आवश्यक सीप र ज्ञान प्रदान गर्ने उद्देश्यले बर्दियाको मधुवन नगरपालिकामा स्थानीय एकीकृत पाठ्यक्रमबारे तीन दिने कार्यशाला सञ्चालन गरिएको छ । गर्ल्स स्ट्यान्डिङ स्ट्रङ्ग परियोजना अन्तर्गत प्लान इन्टरनेशनल नेपाल र बाँके युनेस्को क्लबको सहयोगमा मधुवन नगरपालिका शिक्षा इकाईको आयोजनामा ब स्थानीय एकीकृत पाठ्यक्रमबारे कार्यशाला सञ्चालन गरिएको हो ।

कार्यशालाको उद्घाटन मधुवन गाउँपालिकाका प्रमुख प्रशासकीय अधिकृत मानबहादुर गिरीले गरे । सो अवसरमा बोल्दै उनले वर्तमान परिस्थितिमा शिक्षाको महत्वका साथै एकीकृत पाठ्यक्रम,शिक्षक निर्देशिका र पाठ्यक्रमलाई राम्रोसँग कार्यान्वयन गर्न शिक्षकलाई उत्प्रेरित गर्नु भयको बताए ।

उपमेयर अनिता चौधरीले विद्यालयमा गुणस्तरीय शिक्षा सुधार र एकीकृत पाठ्यक्रम लागू गर्न सबै शिक्षकलार्इ अनुरोध गरिन् । उपमेयर चौधरीको अध्यक्षतामा भएको कार्यक्रममा सामाजिक विकास समितिका संयोजक मीनबहादुर थापा तथा शिक्षा इकाइ प्रमुख नारायणप्रसाद खनालको उपस्थिति रहेको थियो ।

कार्यशालामा कक्षा १ मा पढाउने कुल ३४ जना सहभागी थिए । सहभागीहरूले कार्यशालाको एजेन्डा, छलफल पद्धति र सहजीकरण सीपको प्रशंसा गरेका थिए । उनीहरूले आफ्ना विद्यालयहरूमा पाठ्यक्रम र शिक्षकको निर्देशन लागू गर्ने प्रतिबद्धता व्यक्त गरे।

कार्यक्रमको संचालन शिक्षा इकाइका खगेन्द्र खनालले गरेका थिए । कार्यक्रममा बाँके युनेस्को क्लबका कार्यक्रम संयोजक गोविन्द प्रसाद लामिछानेले कार्यक्रमको उद्देश्य र परियोजनाको विषयवस्तु बारे प्रस्ट पारेका थिए । कार्यक्रम अधिकृत ईश्वर विक, रीता अर्यालको सहभागिता रहेको थियो ।