बुटवल । तत्कालीन राजा वीरेन्द्र शाहको वंशनाश हुने गरि भएको नारायणहिटी दरबार हत्याकाण्डको सम्झनामा बुटवलमा दीप प्रज्वलन गरिएको छ । तत्कालीन राजा वीरेन्द्र शाहको वंशनाश हुने गरि भएको राजदरबार हत्याकाण्ड भएको २३ वर्ष पूरा भएको स्मृतीमा हिमानी ट्रस्ट रुपन्देहीले शनिबार बुटवल(११ देविनगरमा दीप प्रज्वलन गरिएको हो ।
स्व. राजा विरेन्द्र शाहको परिवारको २३ वर्षअघि आजकै दिन वंशनाश भएको स्मृतीमा दीप प्रज्वलन गरिएको हिमानी ट्रस्ट रुपन्देहीको संयोजक प्रजुना श्रेष्ठ शिलवालले बताइन । हालसम्म पनि हत्याकाण्ड रहस्यमय हुनु नेपाली जनताका लागि दुःखद रहेको कार्यक्रमका अतिथि रुपसिंह थापाले बताए ।
करिब ३ सय जना सहभागी रहेको कार्यक्रमको स्वागत कृशला न्यौपाने, सञ्चालन भिमनाथ शर्मा र व्यवस्थापन रोशन क्षेत्रीले गरेका थिए ।
२०५८ जेठ १९ गते राति सवा ९ बजे नारायणहिटी राजदरबारभित्रै तत्कालीन राजा वीरेन्द्र शाहको वंश विनाश भएको थियो । उक्त हत्याकाण्डमा तत्कालीन युवराज दीपेन्द्र शाहलाई मुख्य दोषी देखाइएको थियो तर जनमानसले अहिलेसम्म त्यसलाई पत्याएका छैनन् ।
शुक्रबार बेलुकीको पारिवारिक जमघटका क्रममा घटना घटेको थियो । घटनामा राजा वीरेन्द्रसहित रानी ऐश्वर्य, युवराज दीपेन्द्र, राजकुमार निराजन र राजकुमारी श्रुतिको हत्या भएको थियो । यस्तै राजाका भाइ धीरेन्द्र, राजकुमारी जयन्ती, राजकुमारी शान्ति, राजकुमारी शारदा, कुमार खड्कासहित राजपरिवारका अन्य सदस्यहरूको गोली हानी हत्या भएको थियो ।
उदार राजाको छवि बनाएका वीरेन्द्रको वंशनाश भएपछि नेपालमा राजतन्त्र धेरै समय टिक्न सकेन । उनको निधनपछि राजगद्दीमा बसेका भाइ ज्ञानेन्द्र शाहले राजतन्त्र जोगाउन सकेनन् ।
२०६२/६३ को जनआन्दोलनमार्फत पुनस्स्थापित संसद्ले राजाका सम्पूर्ण अधिकार खोस्यो । २०६५ सालमा गणतन्त्र स्थापना भएसँगै मुलुकमा राजतन्त्र समाप्त भयो ।
प्रतिक्रिया