बुटवल । बुटवलमा लुम्बिनी प्रदेशस्तरीय श्रमाधान रोजगार मेला हुने भएको छ । दीर्घकालीन रूपमा वैदेशिक रोजगार अन्त्य गर्ने र बेरोजगार युवालाई रोजगारमा जोड्ने उद्देश्यसहित यहीँ जेठ २३ र २४ गते श्रम रोजगार तथा सामाजिक सुरक्षा मन्त्रालयले लुम्बिनी प्रदेशस्तरीय रोजगार मेला गर्न लागेको हो ।
संघ, प्रदेश सरकार र स्थानीय बुटवल उपमहानगरपालिकाले संयुक्त रूपमा आयोजना गरिएको मेलामा ४० वटामा स्टलमा आद्योगिक प्रतिष्ठानहरुले रोजगारीमा प्रवेश गर्ने बाटो खोलिदिने सोमबार बुटवलमा आयोजित पत्रकार सम्मेलनमा जानकारी गराइएको हो ।
श्रम रोजगार तथा सामाजिक सुरक्षा मन्त्रालयका कार्यालय प्रमुख कृष्ण खनालले मेलाबाट आन्तरिक र वाह्य रोजगारीको लागि सहजीकरण पनि गरिने बताए । ‘मेलामा सीप विकास, कार्यशाला, नेटवर्किङ सत्र, स्टलहरु र रोजगारीका अवसरबारे प्यानल डिस्कसनहरु हुनेछन’ खनालले भने, ‘मेलामा ४० वटा स्टल हुनेछन । जसमा वायोडाटा निर्माण, सिकाई सम्बन्धी उद्योग व्यवसाय तथा रोजगारदातासँग सम्बन्धित स्टलहरु वैदेशिक रोजगार कल सेन्टर लगायत सरकारी तथा निजी क्षेत्रका स्टलहरु मेलामा हुनेछन ।’ मेला बुटवलस्थित अन्तर्राष्ट्रिय सम्मेलन केन्द्र (बिआइसिसी) मा हुनेछ ।
त्यस्तै सुरक्षित आप्रवासन, रोजगार तथा रोजगारीको खोजी गर्नेहरुको आवश्यकता सम्बन्धी अन्तरक्रिया, कार्यक्रम पनि गरिने छ । बुटवल उपमहानगरपालिकाका प्रमुख खेलराज पाण्डेयले रोजगारीको खोजीमा रहेका युवा र रोजगारदाताको लागि यो कार्यक्रम सहायक सिद्ध हुने विश्वास व्यक्त गरे ।
विकासोन्मुख देशहरुले जस्तै नेपालले पनि रोजगारीको क्षेत्रमा विशेष गरी युवा बेरोजगारीका चुनौतीको सामना गरिरहेको छ । नेपालको ३० वर्षभन्दा मुनीको जनसंख्याको ६३.७ प्रतिशत छ । हरेक वर्ष ४० लाख नेपाली युवा श्रम बजारमा प्रवेश गर्ने गर्छन ।
प्रतिक्रिया