बुटवल । भैरहवास्थित रण अम्बिका आँखा अस्पतालको नयाँ भवन निर्माणका लागि गरिएको टेन्डर प्रक्रिया नियम विपरित गरेको भन्दै लुम्बिनी निर्माण व्यवसायी संघ रुपन्देहीले विरोध जनाएको छ । अस्पतालको भवन निर्माणका लागि गरिएको टेन्डर प्रक्रियामा अमुक निर्माण कम्पनीलाई छनोट गर्ने नियत राखी नियम विपरित ठेक्का प्रक्रिया अगाडि बढाएको भन्दै लुम्बिनी निर्माण व्यवसायी संघ रुपन्देहीले विरोध जनाएको हो ।
संघले सोमबार बुटवलमा पत्रकार सम्मेलनको आयोजना गरि टेन्डर प्रक्रिया विरुद्ध कानूनी उपचारमा जाने चेतावनी दिएको छ । अस्पतालले २०८० चैत्र १६ मा भवन निर्माणका लागि नागरिक दैनिक पत्रीकामा प्रकाशित सुचना अनुसार ठेक्का नं (LEI/NCB/Works-01-80/81) बोलपत्रमा भाग लिएका १७ वटा फर्म कम्पनी दर्ता भएका मध्ये अधिकांश निर्माण व्यवसायीहरुलाई प्राविधिक प्रस्तावमा अस्वीकृत गरी सीमित कम्पनीलाई प्रतिस्पर्धामा सहभागी गराएको संघले आरोप लाएको छ ।
बोलपत्रमा भाग लिएका १७ वटा फर्म कम्पनीले दरखास्त दर्ता गराएपनि २०८१ जेष्ठ ४ गते प्राविधिक प्रस्ताव स्वीकृतको आशय प्रकासीत गरी ३ वटा फर्म मात्र प्राविधिक प्रस्तावमा स्वीकृत गरिएको संघले जनाएको छ । पत्रकार सम्मेलनमा बोल्दै संघकी अध्यक्ष मञ्जु भुसालले सो विषयमा संघले ९ जेष्ठमा प्रस्ताव छनौट पुनः मुल्याङ्कनका लागि पत्र पठाए पनि जबाफ नपाएको बताइन् । उनले अस्पतालले १८ जेष्ठमा बोलपत्र स्वीकृतीको आशय प्रकासित गरि नियोजित रुपमा निर्माण कम्पनी छनोट गरेको बताइन् ।
विडिङ्गमा निर्माण व्यवसायीहरुका १७ वटा कम्पनीहरु प्रतिस्पर्धामा भए पनि बिनाकारण अन्य कम्पनीको प्रस्ताव प्राविधिक प्रस्ताव अस्वीकृत गरि ३ वटा फर्महरु कविन्द्र निर्माण सेवा किर्तिपुर १ काठमाडौं, एपिएम कन्सट्रक्सन एण्ड विल्डस प्रा.लि काठमाडौं-१४, बल्खु र नव सिर्जनशिल कन्सट्रक्सन कम्पनी प्रा.लि काठमाडौं -९, सिनामंगललाई मात्र प्रतिस्पर्धामा सहभागी गराइएको भुसालको आरोप छ ।
सो प्रतिस्पर्धाबाट नव सिर्जनशिल कन्सट्रक्सन कम्पनी प्रा। लि काठमाण्डौ -९, सिनामंगललाई छनोट गरी २२ करोड २९ लाख १० हजार ९७९ रुपैयाँ (मु.अ.करसहित) मा बोलपत्र स्वीकृत गरीएको छ । संघका सल्लाहकार जमिन कक्षपतिले मिलेमतोमा आफू अनुकुलको निर्माण कम्पनीलाई सेटिङ्ग गरेर छनोट गरिएको बताए । संघले प्राविधिक प्रस्ताव अस्वीकार गर्नुको कारण खुलाई सो को सत्यतथ्य आधार बाहिर ल्याउन माग गर्दै पुनः मूल्याङ्कन गराई स्वच्छ प्रतिस्पर्धामा भाग लिने वातावरण बनाउन आग्रह गरेको छ । अस्पताल प्रशासनले भने कानूनी प्रक्रिया अनुसारनै टेन्डर प्रक्रियाबाट निर्माण कम्पनी छनोट गरिएको दाबी गर्दै आएको छ ।
प्रतिक्रिया