बाँकेमा टिपरले ठक्कर दिँदा मोटरसाइकल चालकको मृत्यु, स्थानीयद्वारा टिपरमा आगजनी र सडक अवरुद्ध

बाँके । पूर्वपश्चिम राजमार्गअन्तर्गत बाँकेको राप्तीसोनारी गाउँपालिकामा गएराति टिपरले ठक्कर दिँदा मोटरसाइकल चालकको मृत्यु भएको छ । राप्तीसोनारी-९ स्थित ढकेरीमा ​टिपरको ठक्करले राप्तीसोनारी गाउँपालिका-८ का ३५ वर्षीय लोकेन्द्र विष्टको मृत्यु भएको हो ।

जिल्ला प्रहरी कार्यालय बाँकेका प्रवक्ता एवं सूचना अधिकारी प्रहरी नायब उपरीक्षक नारायण डाँगीका अनुसार गएराति साढे ९ बजेतिर कोहलपुरबाट पूर्वतर्फ जाँदै गरेको भे १ ख ३०१९ नम्बरको टिपरले पूर्वबाट आउँदै गरेको भे १० प १४१३ नम्बरको विष्ट सवार मोटरसाइकललाई ठक्कर दिएको थियो । विष्टको घटनास्थलमै मृत्यु भएको थियो ।​

दुर्घटनापश्चात् टिपर चालक फरार रहेको गाडीका मालिक भने सम्पर्कमा आएको प्रहरीले जनाएको छ । स्थानीयले ठक्कर दिने टिपरमा आगजनी गरेको र सडक अवरुद्ध पारेको डाँगीले जानकारी दिए । सडक खुलाउन प्रहरीले पहल गरिरहेको छ ।