जनता माविका पूर्व प्रधानाध्यापक र पूर्व शिक्षिकाको नाममा सन्ततीले गरे अक्षयकोष स्थापना

खजुरा । बाँके जिल्लाका कुनै बेलाका चर्चाको शिखरमा रहेका जनता माबि सन्तकुटी खजुराका पूर्व प्रधानाध्यापक विष्णुमान श्रेष्ठ र उनकी श्रीमती एवं पूर्व शिक्षिका उमा श्रेष्ठको नाममा उनका तीन सन्ततीले अक्षयकोष स्थापना गरेका छन् ।

सफल प्रधानाध्यापककारुपमा ख्याती कमाएका श्रेष्ठ दप्पत्तिको नाममा उनीहरुका सन्तती छोरी ऋचा लक्ष्मी श्रेष्ठ, पुजा श्रेष्ठ र छोरा रुपेन्द्रमान श्रेष्ठले विद्यालयको ५० औ बर्षको स्वर्ण जयन्ती दिवसको उपलक्ष्यमा अक्षयकोष स्थापना गरेका हुन् । विष्णुमान दम्पत्तिका ३ सन्तानले आज विद्यालयमा पुगेर अक्षयकोषका लागि ३ लाख रुपैयाँको चेक हन्तान्तरण गरेका छन् ।

उनीहरुले स्थापना गरेको उमा बिष्णुू अक्षयकोषबाट गरीब ,जेहन्दार ,खेलाडीलाई सहयोग गर्ने उद्देश्य राखिएको उनहिरुले जनाएका छन् । अक्षयकोषका लागि प्रदान गरिएको रकमको चेक खजुरा गाउँपालिका वडा नम्बर ३ का वडा अध्यक्ष पुर्ण भण्डारी, पालिकाका शिक्षा प्रमुख खगेन्द्र मल्ल, बिद्यालय व्यवस्थापन समितिका अध्यक्ष केहरसिंह थापालाई हस्तान्तरण गरिएको छ ।

चेक हस्तान्तरण कार्यक्रममा विद्यालयका प्रअ महेन्द्र खत्री, पूर्व शिक्षक माधब शर्मा लगायतको उपस्थिती रहेको थियो । प्रधानाध्यापक श्रेष्ठले जनता माबिमा २२ वर्ष अध्यापन गराएका थिए भने शिक्षिका उमाले पनि झण्डै १५ वर्ष बढी सोही बिद्यालयमा पढाएकी थिइन् । तत्कालिन पुनर्वास क्षेत्रमा एक मात्र विद्यालयकारुपमा रहेको जनता माबि त्यस कालखण्डको बाँकेकै चर्चित बिद्यालय रहेको थियो ।