नागरिक उन्मुक्तिको किचलो : रञ्जिता श्रेष्ठलाई संसदीय दलको नेताबाट हटाइयो

काठमाडौं । लामो समयदेखि नागरिक उन्मुक्ति पार्टीमा चलेको आन्तरिक खिचलो संसदीय दलमा पुगेको छ । खिचलोको पछिल्लो घटनामा रञ्जिता श्रेष्ठलाई पार्टीको संसदीय दलको नेताबाट हटाइएको छ । पार्टीको संसदीय दलको सचिवालयको आइतबार बसेको बैठकको बहुमत सदस्यहरूले श्रेष्ठलाई पार्टीको संसदीय दलको नेताबाट हटाउने निर्णय गरेको हो ।

संसदीय दलका नेताको पदमा रहेकी श्रेष्ठलाई हटाएर उनको स्थानमा गंगाराम चौधरी डगौरालाई संसदीय दलको नेता चयन गरिएको छ भने प्रमुख सचेतक पदमा रहेका डगौराको स्थानमा लालवीर चौधरीलाई राख्ने निर्णय गरिएको पार्टीको श्रेष्ठ बिरोधी पक्षबाट प्रकाशित विज्ञप्तिमा उल्लेख छ ।

दलको नेता चयनसम्बन्धी पत्र आज संसद् सचिवालयमा दर्ता गर्ने नयाँ चयन गरिएका दलका नेता गंगाराम चौधरीले बताए ।