श्रीलंकालाई पराजित गर्दै इरान काभा महिला भलिबल प्रतियोगिताको तेस्रो

काठमाडौं । काठमाडौंमा जारी काभा महिला भलिबल नेसन्स लिगमा इरानले तेस्रो स्थान हासिल गरेको छ । बुधबार भएको तेस्रो स्थानको खेलमा दक्षिण एसियाली मुलुक श्रीलंकालाई ३-० को सोझो सेटमा हराउँदै इरानले तेस्रो स्थान हासिल गरेको हो ।

त्रिपुरेश्वरस्थित राष्ट्रिय खेलकुद परिषद् (राखेप) परिसरमा रहेको कभर्ड हलमा भएको खेलमा इरानले पहिलो सेट २५-२२ ले जितेको थियो । दोस्रो सेटमा श्रीलंकाले बलियो चुनौती प्रस्तुत गरे पनि जित निकाल्न भने सकेन । इरानले दोस्रो सेट २८-२६ ले जितेको हो । तेस्रो सेटमा २५-१७ को सहज जित निकालेपछि इरानले प्रतियोगिताको तेस्रो स्थान पक्का गरेको हो ।

प्रतियोगिताको सेमिफाइनलमा इरानलाई नेपालले हराएको थियो । मंगलबार भएको उक्त खेलमा नेपालले इरानलाई ३-० को सोझो सेटमा हराएको हो । यस्तै, श्रीलंका भने भारतसँग ३-० कै सोझो सेटमा पराजित भएको थियो ।