बाँकेको खजुरामा घरबाटै अढाई वर्षीया नाबालिका बेपत्ता, बाघले लगेको आशंका

खजुरा । बाँकेको खजुरामा घरबाटै एक नाबालिका बेपत्ता भएकी छन् । खजुरा गाउँपालिकाको वडा नम्बर-६ सिमलघारीबाट गएराती ढाई वर्षीया नाबालिका बेपक्ता भएको प्रहरीले जनाएको छ ।

गएराती ९ बजेको समयमा खजुरा ६ सिमलघारी नजिकै रहेको घरबाट अढाई वर्षीया लक्ष्मी पुन बेपत्ता भएको इलाका प्रहरी कार्यालय धनौलीले जनाएको छ ।

घरको आगनमा खेलिरहेकी नाबालिका एकाएक हराएपछि गाउँमा खैलाबैला भएको थियो । छिमेकीले प्रहरीमा खबर गरेपछि मध्यरातसम्म खोजी गर्दापनि बालिका फेला नपरेको इलाका प्रहरी धनौलीका इन्चार्ज प्रहरी निरक्षक पुर्ण केसीले बताए ।

घर नजिकै रगतको छिर्का सहित घिसारेको घाँसे मैदान देखिएकाले बाघले लगेको अनुमान गरिएको स्थानीयले बताएका छन् । यसअघि पनि गाँउको गोठबाट बाघले बाख्रा लैजाने गरेको बताउँदै स्थानीयले बालिकालाई पनि बाघले लगेको अनुमान गरे ।

वनको कर्मचारीको सहयोग मागेर बिहानैदेखि बालिकाको खोजि गरिन थालेको प्रहरीले जनाएको छ ।