पोखरा । सहकारी ठगी प्रकरणमा पक्राउ परेका पूर्वगृहमन्त्री रवि लामिछानेलाई तेस्रो पटक अदालतमा म्याद थपका लागि उपस्थित गराएको छ । रवि सहित आज सोही प्रकरणको मुद्दामा हिरासतमा रहेका चार जनालाई प्रहरीले जिल्ला अदालत कास्कीमा उपस्थित गराएको हो ।
जिल्ला प्रहरी कार्यालय कास्कीका अनुसार सूर्यदर्शन सहकारी ठगीमा प्रकाउ परेका गोर्खा मिडियाका पूर्वसञ्चालकसमेत रहेका लामिछाने, छविलाल जोशीसहित सूर्यदर्शन सहकारीको रकम हिनामिनामा जीवी राइसँग जोडिएका लिला पछाईं र नेचर हर्ब्सका रामबहादुर खनाललाई अदालत उपस्थित गराइएको हो ।
तिहार बिदाकै बेलामा म्याद सकिएकोले अनुसन्धानका लागि म्याद थप गर्न प्रहरीले कास्की जिल्ला अदालतमा उपस्थित गराएको हो । न्यायाधीश चन्द्रकान्त पौडेलको इजलासमा म्याद थपमाथि बहस सुरू भएको छ ।
अदालतबाट रविलाई रिहा गर्ने आदेश आएमा बुटवलमा चलेको सुप्रिम सहकारीको मुद्दामा पुनः पक्राउ गरेर रुपन्देही ल्याउने प्रहरीको तयारी रहेको प्रहरीको उच्च स्रोतको दाबी छ । लामिछानेलाई यसअघि दुईपटक म्याद थप गराएर प्रहरीले अनुसन्धान गरेको थियो । लामिछानेलाई कात्तिक २ गेत साँझ काठमाडौंस्थित पार्टी कार्यालयबाटै प्रहरीले पक्राउ गरेको थियो।
गोर्खा मिडियामार्फत सहकारीको रकम अपचलन भएको भन्दै सहकारी ठगी र दुई वा दुईभन्दा बढी समूह मिलेर रकम दुरुपयोग भएको भन्दै रवि र छविविरुद्ध संगठित अपराधको मुद्दामा प्रहरीले अनुसनधान गरिरहेको छ ।
रास्वपाले भने राजनीतिक प्रतिशोधले पार्टी सभापति लामिछानेलाई पक्राउ गरिएको भन्दै विरोध प्रदर्शन गर्दै आएको छ ।
प्रतिक्रिया