बुटवल । रुपन्देहीको लुम्बिनी साँस्कृतिक नगरपालिकाको सिमावर्ती क्षेत्रमा सशस्त्र प्रहरी र राजश्व अनुसन्धान टोलीमाथि ‘तस्कर’हरुको समुहले आक्रमण गरेका छन् । लुम्बिनी सांस्कृतिक नगरपालिका–२ मुजहनाबाट विहीबार साँझ ११२ बोरा चिनी बरामद गरेर फर्किने क्रममा सशस्त्र प्रहरी र राजश्व अनुसन्धान टोलीमाथि आक्रमण भएको हो ।
लुम्बिनी सांस्कृतिक नगरपालिका–२ मुजहनामा अवैध रुपमा नेपाल भित्रियाइ भण्डारण गरिएको चिनी बरामद गर्न गोप्य सूचनाका आधारमा राजस्व अनुसन्धान कार्यालय बुटवलबाट सत्रस्त्र प्रहरी सहितको टोलि मुजहना पुगेको थियो । अनुसन्धान अधिकृत राजबहादुर विष्टको नेतृत्वमा ४ जना र सशस्त्र प्रहरी निरीक्षक अस्मित चौहान मगरको नेतृत्वमा १० जनाको टोलीले मुजहनाका ३२ वर्षीय दिलिप लोधको पक्की घरमा खानतलासी गरी ११२ बोरा चिनी नियन्त्रणमा लिएको थियो ।
बरामद अवैध चिनी लिएर फर्किने क्रममा विहीबार बेलुका करिब ६ बजे एक सय जनाभन्दा बढीले बाटो अवरोध गरेर ढुंगामुढा गरेको राजश्व अनुसन्धान कार्यालयले जनाएको छ । घटना लगत्तै सशस्त्र प्रहरी उपरीक्षक आनन्द थापामगर नेतृत्वको ७० जनाको थप फोर्स पुगेर आक्रमणकारीको अवरोध हटाएको थियो । राजश्व अनुसन्धान कार्यालय बुटवलका प्रमुख विवेक घिमिरेका अनुसार सशस्त्रको थप टोलीले बाटो अवरोध गर्ने समूहलाई तितरबितर पारेर स्थिति नियन्त्रणमा लिएको थियो । बरामद चिनी सहित सवारी साधनहरु राजस्व अनुसन्धान कार्यालय बुटवलमा ल्याइएको घिमिरेले बताए ।
नियन्त्रणमा लिएको चिनी लुटपाट गर्ने उद्देश्यले आक्रमण भएको अनुमान गरिएको छ । ढुंगामुढाबाट इलाका प्रहरी कार्यालय लुम्बिनीका प्रहरी निरीक्षक दीपक मगराती, सशस्त्र प्रहरी नायब निरीक्षक काशी प्रसाद चौधरी र सशस्त्र प्रहरी जवान चन्द्रमा पाण्डेलगायतलाई सामान्य चोट लागेको सशस्त्र प्रहरी बल नेपाल २७ नम्बर गणका सूचना अधिकारी डिएसपी दुर्गा थापाले बताए । ढुंगामुढाबाट सशस्त्र प्रहरी बल नेपाल सुरक्षा बेस लुम्बिनीको ना १ झ १४७७ नम्बरको गाडीमा क्षति पुगेको छ ।
स्थानीयका अनुसार रुपन्देहीको सिमावर्ती क्षेत्रबाट ठूलो मात्रामा तस्करी हुने गरेको छ । सशस्त्र प्रहरीले मात्रै ९ महिनाको अवधिमा १० करोड बढीको अवैध सामान नियन्त्रणमा लिएको जनाएको छ भने नेपाल प्रहरीले पनि करिब ५ करोडको अवैध सामान नियन्त्रणमा लिएको छ ।
प्रतिक्रिया