बुटवल । बुटवलमा अन्तर विद्यालय स्तरीय छैटौ राष्ट्रपति रनिङ शिल्ड प्रतियोगिता २०८१ को तयारी पुरा भएको छ । आइतबार पत्रकार सम्मेलनको आयोजना गरी प्रतियोगिताको सम्पूर्ण तयारी पुरा भएकोे नगर खेलकुद विकास समितिले जानकारी दिएको छ ।
बुटवल उपमहानगरपालिकाले विद्यालयस्तरमा खेलाडी उत्पादन गर्ने उदेश्यका यही पुस १६ गतेदेखि १८ गतेसम्म बुटवलमा प्रतियोगिता गर्न लागेको हो । पत्रकार सम्मेलनमा बोल्दै नगर खेलकुद विकास समितिका संयोजक बोनिन पियाले प्रतियोगिताको सम्पूर्ण तयारी पुरा भएकोे बताए ।
बालबालिकालाई शैक्षिकसंगै खेलकुद अनिवार्य विषय भएको उल्लेख गर्दै उनले विगतका वर्षहरुमा प्रमाणपत्रमात्र दिने गरिएकोमा पछिल्लो ३ वर्षदेखि नगद पुरस्कार पनि वितरण गरिदै आएको जनाए । उनले अहिले पनि खेलाडी पुरस्कार निक्कै कम हुने गरेको बताउँदै त्यसलाई वृद्धि गर्न जरुरी रहेको बताए ।
उनका अनुसार यसवर्ष छात्रा भलिबल एभरेस्ट बोर्डिङ स्कुलको खेलमैदान, हाईजम्प कालिका मानवज्ञान माबि, छात्र भलिबल सिद्धेश्वर कोर्टमा गरिने छ । सिद्धेश्वर लाल कुमारी माबि खेल मैदानमा आयोजना हुने प्रतियोगितामा नगरभित्रका सामुदायिक र निजि गरि ५३ विद्यालयहरु सहभागी हुने छन् । जसमा भलिबल, कबड्डी, तेक्वान्दो, कराते (छात्ररछात्रा), एथलेटिक्स लगायत समावेश छन् । प्रतियोगिताहरु ३ दिनसम्म संचालन हुने छ ।
यो वर्ष एन्फा एकेडेमी खेलमैदान मर्मतको क्रममा रहेको हुदा सिद्धेश्वर खेलमैदानमा गरिने अध्यक्ष श्रेष्ठले बताए ।
पत्रकार सम्मेलनमा बोल्दै नगरप्रमुख खेलराज पाण्डेले बुटवल उपमहानगर पूर्वाधार विकास र खेल विकासमा लागेको बताए । फुटबलको आठ, क्रिकेटको ३ मैदान तयार गर्ने लक्ष्यसहित काम अघि बढेको जनाउँदै यनले लनटेनिस, बास्केटबल कोर्टहरुमा समेत लगानी भएको जानकारी दिए । ‘ यसवर्ष मात्र साढे ३ करोड रुपैया बजेट खेलकुदमा बिनियोजन गरिएको छ ।’– उनले भने ।
यो वर्ष बुटवल–१६ को डहरगाउमा क्रिकेट मैदान निर्माण गर्न ७५ लाख रुपैया, तिलोत्तमा गोल्डकपलाई ३५ लाख रुपैया बिनियोजन गरिएको उनले बताए ।
कार्यक्रममा उपप्रमुख सावित्रादेवि अर्याल, समितिका सदस्यसचिव प्रेम बस्नेत, प्रतियोगिता मुल्यांकन समितिका संयोजक लालहरि पाण्डेले प्रतियोगिताका बारेमा जानकारी दिएका थिए । गतवर्ष कालिका मानवज्ञान माबि उपाधि विजेता रहेको थियो ।
प्रतिक्रिया