बुटवल । बुटवल उपमहानगरपालिकामा आजदेखि करिब १० हजार किशोरीलाई ‘ह्युमन पापिलोमा भाइरस’ (एचपिभी) खोप लगाइँदै छ । महिलाको पाठेघरको मुखमा लाग्ने क्यान्सर उन्मूलन गर्न राष्ट्रव्यापी रूपमा सञ्चालन हुने एचपिभी खोप अभियानमा बुटवलमा ९ हजार ९६१ जना किशोरीहरूलाई खोप लगाइने भएको हो ।
उपमहानगरका स्वास्थ्य शाखा प्रमुख युवराज पाण्डेका अनुसार खोप अभियानअन्तर्गत कक्षा ६ देखि १० सम्म अध्ययन गर्ने तथा विद्यालय बाहिरका १० देखि १४ वर्षसम्मका सबै किशोरीलाई एचपिभी खोप लगाउने गरी तयारी गरीएको बताए ।
यहाँ खोप लगाउन कुल ८३ वटा खोप केन्द्र निर्धारण गरिएको छ । बुटवल भित्रका ७० वटा विद्यालय, १२ वटा स्वास्थ्य संस्था स्तरीय खोप केन्द्र तथा खोप अभियानमा छुटेकाहरुलाई आम्दा अस्पतालमा माघ २८ र २९ गते दुई दिन खोप लगाइने स्वास्थ्य शाखा प्रमुख पाण्डेले बताए । बुटवलमा आवश्यक खोपको मात्रासमेत आइसकेको उनले बताए । खोप कार्यक्रमलाई प्रभावकारी बनाउन खोप दिने स्वास्थ्यकर्मी, खोप केन्द्रमा खटिने स्वयमसेवकहरु तथा सरोकारवाला पक्षसँग छलफल तथा अभिमुकिकरणका कार्यक्रमहरु गरिएको उनले बताए ।
बुटवलमा खोप अभियानका लागि १७२ जना स्वास्थ्य स्वयम् सेविका, ७० जना विद्यालयका शिक्षिका तथा नर्स र ४६ जना स्वास्थ्यकर्मी खटिनेछन् ।
प्रतिक्रिया