चीनको अस्पतालमा आगलागी हुदाँ जलेर २० को मृत्यु

काठमाडौं । उत्तरी चीनको हेबेई प्रान्तमा एउटा नर्सिङ होममा आगलागी हुँदा २० जनाको मृत्यु भएको छ । मंगलबार राति करिब ९ बजे चेङ्दे सहरको लङहुआ काउन्टीमा आगलागी भएको हो ।

धेरै प्रयासपछि मात्रै त्यो आगो निभाउन सकिएको आपतकालिन निकायका अधिकारीहरुले बुधबार बताए । सरकारी समाचार एजेन्सी सिन्ह्वाले स्थानीय अधिकारीहरूलाई उद्धृत गर्दै बुधबार बिहानसम्म कुल २० जनाको मृत्यु भएको पुष्टि गरेको बताएको छ। यस घटनामा अन्य कैयौं व्यक्ति घाइते भएका छन् तर आगलागीको कारण भने खुल्न सकेको छैन । आगलागीबाट बच्न धेरैले भवनबाट हाम फालेका थिए । आगलागीको कारणबारे अनुसन्धान भइरहेको जनाइएको छ ।

आगो लाग्दा नर्सिङ होममा धेरै वृद्धवृद्धा र कर्मचारीहरु उपस्थित थिए । दमकलले आगो निभाउन तत्कालै पहल गरे पनि आगो निकै डरलाग्दो भएकाले निभाउन निकै समय लागेको थियो । समाचार एजेन्सी सिन्ह्वाका अनुसार यस घटनापछि स्थानीय प्रशासनले अनुसन्धान सुरु गरेको छ र आगलागी कसरी भयो भन्ने पत्ता लगाउने प्रयास गरिरहेको छ ।

उद्धार गरिएका मानिसहरूलाई नजिकैको अस्पतालमा भर्ना गरिएको छ र उनीहरूको निरीक्षण र उपचार भइरहेको छ। यस घटनाले सम्पूर्ण क्षेत्रमा शोक र चिन्ताको वातावरण सिर्जना गरेको छ ।