शिक्षक महासंघको चेतावनी सरकारी भिजिलान्तेले शान्तिपूर्ण आन्दोलन भड्काए, थप सशक्त बनाउँछौं
काठमाडौं । नेपाल शिक्षक महासंघले सरकारद्वारा संरक्षित भिजिलान्तेहरू आन्दोलनमा प्रवेश गरी स्थिति भड्काएको आरोप लगाएको छ ।
महासंघ अध्यक्ष लक्ष्मीकिशोर सुवेदी र महासचिव तुलाबहादुर थापाले सोमबार विज्ञप्ति जारी गरी आफुहरुको शान्तिपूर्ण आन्दोलनमा सरकारद्वारा संरक्षित मान्छेहरू प्रवेश गरी ढुंगामुढा गर्दै स्थिति भड्काएको आरोप लगाएका हुन् ।
विज्ञप्तिमा भनिएको छ, ‘शान्तिपूर्ण आन्दोलन र विरोध सभामा सरकारद्वारा संरक्षित केही भिजिलान्तेहरु पसेर ढुङ्गामुढा गरी स्थिति भड्काउ बनाई त्यसैको आडमा प्रहरीबाट शिक्षक-कर्मचारीमाथि पानीको फोहरा हान्ने, ढुङ्गा हान्ने तथा निर्मम ढङ्गबाट लाठी प्रहार गर्ने काम भएको छ ।’
महासंले आइतबारको घटनामा ६२ जना शिक्षकहरु घाइते भएको र तीमध्ये झण्डै एकदर्जन शिक्षकको अवस्था गम्भीर रहेको पनि जनाएको छ ।
शिक्षकहरुले निषेधित क्षेत्र तोड्न खोजेपछि हिजो प्रहरीले लाठीचार्ज र पानीको फोहोरा हानेको थियो। प्रदर्शनकारी शिक्षकहरुले पनि ढुंगामुढा गरेका थिए ।
महासंघले विद्यालय शिक्षा ऐनबिना आफ्नो कार्यक्षेत्रमा नफर्किने पुनः उद्घोष गर्दै आन्दोलनलाई थप सशक्त बनाउन देशभरका शिक्षक कर्मचारीहरुलाई काठमाडौं आउन आह्वान गरेको छ ।
विद्यालय शिक्षा सुधारका विषय समेट्दै तत्काल शिक्षा ऐन पारित गर्नुपर्ने मागका साथ गत चैत २० गतेदेखि शिक्षकहरु काठमाडौंमा दैनिक प्रदर्शन गरिरहेका छन् । उनीहरुको माग सम्बोधन गर्न सरकारले भने कुनै चासो दिएको छैन ।
प्रतिक्रिया