९ वर्षीय बालकको गाडिएको अवस्थामा शव भेटियो

कोहलपुर । दोस्रो बुवा र आमासँग बस्दै आएका एकजना ९ वर्षीय बालकको शव गाडिएको अवस्थामा फेला परेको छ । बाँकेको बैजनाथ गाउँपालिका—४ नौलापुरमा ९ वर्षीय कुशल बुढाको गाडिएको अवस्थामा शव भेटिएको हो ।

घरबाट हराएको भनेर उजुरी आएको ८ दिनपछि कुशलको गाडिएको अवस्थामा शव फेला परेको प्रहरीले जनाएको छ । कोहलपुर प्रहरीमा बालक हराएको भन्दै कुशलकि आमाले जाहेरी दिएकी थिइन् ।

प्रहरीका अनुसार आफ्नो बुवाको सानै उमेरमा मृत्यु भएपछि मृतक कुशल उनका दोस्रो बुवा र आमा सहित कोहलपुर नगरपालिका ११ हरियाली मार्गमा भाडाको कोठामा बस्दै आएका थिए । स्थायी घर दैलेखको दुल्लु रहेका कुशलको आमाले दुल्लु नगरपालिका १० का निरक नाथ योगीसंग दोस्रो विहे गरेकी थिइन् ।

मृत अवस्थामा शव भेटिएसँगै प्रहरीलदे कुशलका आमा र दोस्रो बुवालाई सोधपुछका लागि नियन्त्रणमा लिएको छ । मृतक कुशल कोहलपुरमा माविमा अध्ययनरत थिए । घटनाको अनुसनधान भइरहेको प्रहरीले जनाएको छ ।