नेपालगन्ज । वरिष्ठ अधिवक्ता एवं नेपाल बारका पूर्व उपाध्यक्ष टिकाजङ्ग सिंहको निधन भएको छ । न्युरो अस्पताल नेपालगन्जमा उपचारका क्रममा उनको ७९ वर्षको उमेरमा निधन भएको हो ।
लामो समयदेखि अस्वस्थ रहेका सिंहलाई भारतको लखनउबाट उपचार गरेर हिजो मात्र नेपालगन्ज ल्याइएको थियो । अधिवक्ता प्रल्हादबहादुर कार्कीका अनुसार मधुमेह, उच्चरक्तचापको दिर्घ रोगसँग लडिरहेका सिंहलाई पछिल्लो पटक कानको शल्यक्रिया गरेपछि स्वास्थ्य कमजोर हुँदै गएको थियो ।
खरो विचारको परिचय बनाएका सिंहलाई जनयुद्धकालमा तत्कालिन शाही नेपाली सेनाले माओवादीको आरोपमा पक्राउ गरि चरम यातना दिएको थियो । द्वद्वकालमा माओवादी निकट रहेर माओवादीहरुलाई सघाएका सिंह पछिल्लो समयभने राजनीतिबाट टाढा देखिन्थे । सामाजिक सेवा र ब्रम्हकुमारी धार्मिक कार्यमा सक्रिय सिंह नेपालगन्जका पुराना अधिवक्ता मध्यका एक हुन् । उनी रुकुमबाट बसाई सरेर नेपालगन्ज आएका हुन् ।
सिंहको परिवारका सदस्य नेपालगन्ज बाहिर रहेकाले आज उनको पार्थिव शरिरलाई घरमै राखिने र सम्भवत भोलि दाहसंस्कार गरिने अधिवक्ता कार्कीले जानकारी दिए ।
अधिवक्ता सिंहको श्रीमती र ३ छोरा छन् ।
प्रतिक्रिया