सुनवलमा हावाहुरीले रुख ढल्दा च्यापिएर २ जनाको मृत्यु, ३ घाइते

बुटवल । पश्चिम नवलपरासीको सुनवल नगरपालिका-७ चारपालमा शुक्रबार दिउँसो हावाहुरीले रुख ढल्दा च्यापिएर २ जनाले ज्यान गुमाएका छन् । उक्त घटनामा परी अन्य ३ जना घाइते भएको सुनवल-७ का वडा अध्यक्ष नारायण प्रसाद आचार्यले जानकारी दिए ।

सुनवल-७ का अन्दाजी ३० वर्षीया मिरा बयम्बो र ३५ वर्षीय दुर्गाबहादुर पुनको मृत्यु भएको घटनास्थलमा पुगेका वडा अध्यक्ष आचार्यले ग्लोबल आवाजलाई जानकारी दिए । यसैगरी सोही ठाउँका नर्मा परियार, दुर्गा खाम्चा र एक जना परिचय नखुलेका पुरुष घाइते भएका छन् । उनीहरुलाई उद्धार गरी उपचारका लागि रुपन्देहीको देवदह मेडिकल कलेजमा पठाइएको वडा अध्यक्ष आचार्यले जानकारी दिए ।

शुक्रबार दिउँसो करिब साढे ३ बजेको समयमा एक्कासी ठूलो हावाहुरीसँगै वर्षा भएपछि उनीहरु प्रतिक्षालयमा बसेका थिए । सोही समयमा त्यहाँ रहेको रुख ढल्दा उनीहरु च्यापिएका हन् ।