बुटवल । विद्युतीय अपराध (साइबर क्राइम) मुद्दामा एकजना पालिका अध्यक्षलाई प्रहरीले पक्राउ गरेको छ । कपिलवस्तुको शुद्धोधन गाउँपालिका अध्यक्ष कमलेशशरण चौधरीलाई विद्युतीय अपराध मुद्दामा प्रहरीले पक्राउ गरेको हो ।
जिल्ला अदालत रुपन्देहीको पक्राउ पुर्जीका आधारमा उनलाई इलाका प्रहरी कार्यालय बुटवलले पक्राउ गरेको हो । पक्राउ परेका अध्यक्ष चौधरीमाथि बलात्कृत महिला तथा उनको परिवारको गोपनीयता सार्वजनिक गरेको अभियोगमा गत जेठ १ गते रुपन्देही जिल्ला अदालतबाट पक्राउ पुर्जी जारी भएको थियो ।
अदालतको आदेशपछि चौधरी केही दिन सम्पर्कविहीन थिए । मंगलबार भने उनी बुटवल आएको बेला इलाका प्रहरी कार्यालय बुटवलको टोलीले पक्राउ गरेको रुपन्देही प्रहरी प्रवक्ता डीएसपी सुरज कार्कीले जानकारी दिए ।
चौधरीलाई पक्राउ गरेर बुझाउन इलाका प्रहरी कार्यालयले जिल्ला प्रहरी कार्यालय कपिलवस्तुलाई सोमबार पत्राचार गरेको थियो । पक्राउ परेका चौधरीलाई प्रहरीले अनुसन्धान र म्याद थप प्रक्रियाका लागि सरकारी वकिल कार्यालय लगेको छ । उनी लोकतान्त्रिक समाजवादी पार्टीबाट पालिका अध्यक्षमा निर्वाचित भएका थिए ।
प्रतिक्रिया