बुटवल । ललितकला प्रज्ञाप्रतिष्ठानले आयोजना गरेको राष्ट्रिय ललितकला प्रदर्शनी २०८२ मा लुम्बिनी प्रदेशबाट फोटोग्राफर एवम् सिनेकर्मी मनीष पन्थले खिचेको अर्गानिक फोटोले श्रेष्ठता हासिल गर्दै पुरस्कृत भएको छ ।
नेपाल सरकारका पर्यटन, संस्कृति तथा नागरिक उड्डयनमन्त्री माननीय बद्री पाण्डेयले विशेष कार्यक्रमकाबीच काठमाडौंमा मनीषलाई प्रमाणपत्र तथा नगदसहित पुरस्कृत गरेका छन् ।
मनीष पन्थ, बुटवल क्षेत्रमा रहेर ढाई दशकदेखि फोटोग्राफी, फिल्म छायांकन, निर्देशन तथा फोटो पत्रकारितामा सक्रिय छन् । उनी लुम्बिनी फोटोग्राफर संघ, रुपन्देहीको निवर्तमान अध्यक्ष तथा नेपाल फोटोग्राफर महासंघको केन्द्रीय सदस्य समेत रहेका छ्न् ।
ललितकला प्रदर्शनीमा पुरस्कृत हुँदा आफ्नो कला तथा मिहिनेतले सार्थकता पाएको र थप काम गर्न प्रेरणा मिलेको मनीषले बताए ।
ग्रामीण जीवन र कृषिकर्मसँग सम्बन्धित फोटोले बुटवल तथा काठमाडौं भएको ललितकला प्रदर्शनीमा धेरैको मन खिचेको र आफूले पुरस्कार पाउन सक्ने अड्कल काटेको मनीषले सुनाए । नगद पुरस्कारसहित प्रमाणपत्रद्वारा पुरस्कृत तथा सम्मानित हुँदा प्रतिष्ठानले आफ्नो कलालाई कदर गरेको बताए । मनीष भन्छन्( प्रतिष्ठानले मलाई र मेरो फोटोलाई पुरस्कृत गरिरहँदा कृषिकर्मलाई सम्मान गरेको महसुस् गरेको छु ।
ग्रामीण भेगमा आफूले खिचेको अर्गानिक फोटोले नेपालको उन्नति र प्रगति कृषिबाटै सम्भव छ र यसलाई युग सुहाउँदो प्रविधिमैत्री बनाउन सन्देश प्रवाह गरेको उल्लेख गरे ।
‘राष्ट्रिय ललितकला प्रदर्शनी-२०८२’ मा देशका ६५ जिल्लाका लोककला, शिल्प-हस्तकला, परम्परागत चित्रकला/मूर्तिकला, वास्तुकला, समसामयिक/आधुनिक चित्रकला/मूर्तिकला, बहुआयामिक तथा अन्य सिर्जनात्मक कला, प्रतिस्थापन, भावभङ्गिमा, फोटोग्राफी, भिडियो आर्ट, डिजिटल, कार्टुनलगायतका विविध विधाका प्रतियोगी, अप्रतियोगी र आमन्त्रित ६०५ कलाकारका ६५० भन्दा बढी कलाकृति समावेश छन् जसमा मुख्यतः थारू, अवधी, मिथिला, नेवार, पर्वते, भोजपुरी, तामाङ, राउटे, डोम, राई, किराँतका कलाको विशेष सहभागिता रहेको छ ।
प्रतिक्रिया