९० वर्षीय वृद्धबाट श्रीमतीको हत्या

नवलपुर । नवलपुरको देवचुली नगरपालिका–३ आम्बासमा एक वृद्धले आफ्नै श्रीमतीलाई रड प्रहार गरेर हत्या गरेका छन्।

मङ्गलबार राती ९० वर्षीय दिलबहादुर थापाले आफ्नी ७६ वर्षीया पत्नी जमुना थापाको टाउकोमा फलामको रडले प्रहार गरी हत्या गरेका हुन्।

घटनास्थलमै जमुनाको ज्यान गएको जिल्ला प्रहरी कार्यालय नवलपुरले जनाएको छ । प्रारम्भिक अनुसन्धानअनुसार दम्पतीबीच घरेलु विवाद चर्किँदै जाँदा हातपातको अवस्था सिर्जना भएको थियो। त्यसक्रममा श्रीमानले फलामको रड प्रयोग गरी श्रीमतीको टाउकोमा प्रहार गरेका थिए। गम्भीर चोटका कारण घटनास्थलमै मृत्यु भएको हो।

प्रहरीले हत्यापछि फरार भएका दिलबहादुरलाई केही समयमै नियन्त्रणमा लिएको छ। अहिले उनलाई नियन्त्रणमा लिएर आवश्यक अनुसन्धान भइरहेको प्रहरीले जनाएको छ।