काठमाडौं । उपप्रधानमन्त्री तथा अर्थमन्त्री विष्णु पौडेलले सडक पूर्वाधार निर्माणलाई सरकारले उच्चप्राथमिकतामा राखेको बताएका छन् ।
बुधबार काठमाडौंमा सुरु भएको नाइमा मोबिलिटी एक्स्पो को उद्घाटन गर्दै मन्त्री पौडेलले सडक पूर्वाधार निर्माण सरकारको उच्चप्राथमिकतामा रहेको बताएका हुन् । उनले मुलुकको समग्र आर्थिक विकासमा यातायात (मोबिलिटी) क्षेत्रको महत्त्वपूर्ण योगदान रहेको उल्लेख गर्दै सरकार यस क्षेत्रको गुणस्तरीय सडक पूर्वाधार निर्माणमा प्रतिबद्ध रहेको जनाए । उनले देशका प्रमुख सडक आयोजना-एक्सप्रेसवे, हुलाकी सडक, मध्यपहाडी लोकमार्ग, मदन भण्डारी राजमार्ग र काठमाडौं-निजगढ द्रुतमार्ग-लाई तीव्र गतिमा अगाडि बढाउने काम भैरहेको जानकारी दिए।
अर्थमन्त्री पौडेलले सहरी क्षेत्रलाई धुलो तथा हिलोमुक्त बनाउनेतर्फ पनि सरकार विशेष ध्यान दिइरहेको पनि बताए । उनले भने, ‘सहरी क्षेत्रलाई धुलो तथा हिलोमुक्त बनाउनेतर्फ पनि सरकारले विशेष ध्यान दिइरहेको छ।’
कार्यक्रममा नाइकाका अध्यक्ष रितुसिंह वैद्यले उपयुक्त प्रदर्शनीस्थलको अभावले समस्या भइरहेको बताएकी थिइन । वैद्यलाई जवाफ दिँदै अर्थमन्त्री पौडेलले टुकुचा पश्चिम क्षेत्रमा अन्तर्राष्ट्रियस्तरको अत्याधुनिक प्रदर्शनीस्थल निर्माणका लागि चालु वर्षकै बजेटमा व्यवस्था गरिएको जानकारी दिँदै आगामी तीन वर्षभित्र सो निर्माण सम्पन्न हुने बताए।
प्रतिक्रिया