रूपन्देही–३ मा उम्मेदवार बन्न रास्वपामा ९ जनाको आवेदन

काठमाडौं । रूपन्देही क्षेत्र नम्बर ३ मा हुने प्रतिनिधिसभा उपनिर्वाचनका लागि राष्ट्रिय स्वतन्त्र पार्टी (रास्वपा)बाट उम्मेदवार बन्न इच्छुक ९ जनाले आवेदन दिएका छन्। रास्वपाले इच्छुक उम्मेदवारहरुको नामावली आज सार्वजनिक गरेको हो ।

रास्वपाले साउन ७ देखि २१ गतेसम्म उम्मेदवारीका लागि आवेदन खुला गरेको थियो। सो अवधिमा ९ जनाले औपचारिक रूपमा नाम दर्ता गराएका हुन् ।

आवेदन दिनेमा सुलभ खरेल, पार्थिवेन्द्र उपाध्याय, डा। लेखजंग थापा, ज्ञानु पौडेल, जीतबहादुर गुप्ता, कुसुम महर्जन, रचना क्षेत्री, पुनम कुमारी अग्रवाल र मधुप्रसाद अर्याल रहेका छन्। उम्मेदवार बन्न चाहने प्रत्येक व्यक्तिले २५ हजार रुपैयाँ शुल्क बुझाउनुपर्ने व्यवस्था गरिएको थियो।

रास्वपाले प्राप्त आवेदकमध्येबाट अन्तिम उम्मेदवार छान्ने प्रक्रिया अघि बढाएको छ। भदौ १५ गतेभित्र उम्मेदवारको टुंगो लगाउने गरी पार्टीले कार्यतालिका तयार पारेको छ।