काठमाडौं। कम्प्युटरको स्रोत संकेत (सोर्स कोड) चोरी गरेको आरोपमा नेपाल प्रहरीको साइबर ब्यूरोले दुई जनालाई पक्राउ गरेको छ।
पक्राउ पर्नेमा सर्लाहीको चन्द्रनगर गाउँपालिका–५ का २६ वर्षीय सुजनकुमार महतो र धादिङको ज्वालामुखी गाउँपालिका–४ का २४ वर्षीय सुमन श्रेष्ठ छन् ।
प्रहरीका अनुसार उनीहरूले एक सफ्टवेयर कम्पनीको सोर्स कोडमा अनधिकृत रूपमा पहुँच पुर्याई चोरी गरेका थिए । साइबर ब्यूरोको प्रारम्भिक प्राविधिक अनुसन्धान र विश्लेषणमा बौद्धिक सम्पत्तिमा क्षति पुर्याउने मनसाय प्रष्ट भएपछि उनीहरुलाई नियन्त्रणमा लिइएको हो ।
उनीहरूलाई काठमाडौं जिल्ला अदालतबाट ५ दिन म्याद थप गरी आवश्यक अनुसन्धान भइरहेको प्रहरीले जनाएको छ।
प्रतिक्रिया