काठमाडौं । गणतन्त्र इन्डोनेसियाको ८० औँ स्वतन्त्रता दिवसको अवसरमा आइतबार काठमाडौंमा झन्डोत्तोलन कार्यक्रम सम्पन्न भएको छ । नेपालका लागि गणतन्त्र इन्डोनेसियाका अवैतनिक वाणिज्य दूतको कार्यालय, आइएमई कम्प्लेक्स परिसर, पानीपोखरीमा विशेष समारोहबीच झन्डोत्तोलन गरिएको हो ।
कार्यक्रममा नेपालका लागि इन्डोनेसियाका अवैतनिक वाणिज्य दूत चन्द्रप्रसाद ढकालले नेपाल-इन्डोनेसियाबीचको सम्बन्ध ऐतिहासिक र सुमधुर रहेको उल्लेख गर्दै यसलाई जनस्तरसम्म विस्तार गर्न आफू निरन्तर प्रयत्नशील रहेको बताए । उनले आपसी व्यापार, अनुभव आदान-प्रदान तथा पर्यटनजस्ता क्षेत्रलाई अझ मजबुत बनाउनुपर्नेमा जोड दिए ।
नेपाल र इन्डोनेसियाबीच सन् १९६० मा औपचारिक कूटनीतिक सम्बन्ध स्थापना भएको हो । हाल नेपालका लागि इन्डोनेसियाको आवासीय राजदूतको कार्यालय बङ्गलादेशको ढाकामा रहेको छ । आसियान मुलुकहरूमध्ये ठूलो अर्थतन्त्र भएको इन्डोनेसियासँग नेपालले व्यापार, आयात-निर्यात र पर्यटनका क्षेत्रमा प्रशस्त सम्भावना रहेको पनि उनले बताए ।
झन्डोत्तोलन कार्यक्रममा नेपालमा बसोबास गर्दै आएका इन्डोनेसियाली नागरिक, वाणिज्य दूत कार्यालयका प्रतिनिधि तथा आइएमई ग्रुपका कर्मचारीहरूको उपस्थिति थियो ।
प्रतिक्रिया