दशैँ-तिहारमा सवारी भाडा नबढ्ने

काठमाडौं । भौतिक पूर्वाधार तथा यातायात मन्त्रालयले यसपटक दशै–तिहारमा सार्वजनिक यातायातको भाडा नबढ्ने जनाएको छ । आइतबार बसेको पूर्वाधार विकास समितिमा बोल्दै भौतिक पूर्वाधार तथा यातायात मन्त्री देवेन्द्र दाहालले दशैं र तिहारको समयमा भाडा नबढ्ने जनाएका हुन् ।

उनले इन्धनको मूल्य बढे बढाउने, मूल्य घटे घटाउने खालको अटोमेसन सिस्टम नेपालमा रहेपनि यसपालीको दशैँ तिहारमा भाडा बढाउने योजना नरहेको जानकारी दिए ।

उनले मन्त्रालयको मातहतमा रहेका सडकहरु प्रदेश सरकारलाई हस्तान्तरण गर्ने तयारी गरिएको बताए । मन्त्री दाहालले यसअघि केन्द्रले तोकेर सडक प्रदेशलाई जिम्मा लगाउने गरिएपनि अहिले प्रदेश सरकारबाट माग भएपछि मात्र प्रदेशलाई हस्तान्तरण गर्ने निती बनाईएको बताए ।

व्यवसायीहरुलाई दशैं र तिहारको बेलामा मानिसको चहलपहल बढि हुने मौका पारेर भाडा बढाउने गरेको गुनासो आएको बताउँदै मन्त्री दाहालले त्यस्तो नगर्न पहल गरिएको र आफुखुसी बढाइए कारवाही हुने बताए ।