काठमाडौं । उखु किसान सडक आन्दोलनमा उत्रिएका बेला दूध उत्पादक किसानहरू पनि आन्दोलित भएका छन् । दूधको मूल्य भुक्तानी नपाएको भन्दै उनीहरूले आज (आइतबार) काठमाडौंको लैनचौरस्थित दुग्ध विकास संस्थान (डीडीसी) को कार्यालयमा धर्ना दिँदैछन् ।
अखिल नेपाल किसान महासंघका प्रचार तथा प्रकाशन विभाग प्रमुख डा. भेषराज अधिकारीका अनुसार धर्ना कार्यक्रम मध्याह्न १२ बजे सुरु भएर करिब एक घण्टा चल्नेछ । धर्नामा काठमाडौं उपत्यकासहित काभ्रे, नुवाकोट, धादिङलगायत जिल्लाका किसानहरूको सहभागिता रहने छ ।
डा। अधिकारीले गत वर्षदेखि नै दूधको भुक्तानी नपाउँदा किसानहरू ठूलो आर्थिक संकटमा परेको बताए । “दूधको बक्यौता रकम भुक्तानी नगरेकाले किसानहरूले परिवार पालनपोषण, छोराछोरीको शिक्षा-दीक्षा र पशुपालनमा गम्भीर कठिनाइ व्यहोर्नुपरेको छ,” उनले भने ।
किसान महासंघका अनुसार दूधको बक्यौता भुक्तानीबारे पटक-पटक सम्बन्धित निकायलाई ध्यानाकर्षण गराउँदा पनि सम्बोधन नभएकाले बाध्य भएर धर्ना दिनुपरेको हो । उनीहरूले आफ्ना जायज माग पूरा गराउन दबाब दिने उद्देश्यले आन्दोलन थालेका छन् ।
यसैबीच, उखु किसानहरूले पनि सरकारले अनुदान रकम प्रतिक्विन्टल ७० रुपैयाँबाट घटाएर ३५ रुपैयाँमा सीमित गर्ने निर्णय गरेपछि आन्दोलित भएका छन् । उनीहरूले काठमाडौंको माइतीघरमा प्रदर्शन गर्दै आएका छन् भने आगामी भदौ २५ गतेदेखि राजमार्ग अवरुद्ध पारेर आन्दोलन गर्ने निर्णय गरेका छन् ।
प्रतिक्रिया