विराटनगर । नेपाली कांग्रेस सभापति तथा पूर्वप्रधानमन्त्री शेरबहादुर देउवाले पूर्वराष्ट्रपति र उपराष्ट्रपतिलाई राजनीतिमा आउन संविधानले नरोक्ने बताएका छन् । विराटनगर विमानस्थलमा पत्रकारहरुसँग कुरा गर्दै उनले संबिधानले पूर्वराष्ट्रपति र उपराष्ट्रपतिलाई राजनीतिमा आउन पाइन्छ पनि नभनेको र पाइन्न पनि नभनेको बताए ।
पूर्वराष्ट्रपति विद्यादेवी भण्डारीले नेकपा एमालेको राजनीतिमा फर्किएको घोषणा गरेपनि एमालेबाट अवरोध भएका बेला देउवाबाट यस्तो धारणा आएको हो । पूर्वराष्ट्रपतिले पाउने सुबिधा त्यागेको घोषाण गर्दै एमाले राजनीतिमा फर्कने घोषणा गरेपनि एमालेले भण्डारीको सदस्यता नवीकरण नगर्ने निर्णय गरिसकेको छ । पूर्वउपराष्ट्रपति नन्दबहादुर पुन भने नेकपा माओवादी केन्द्रको राजनीतिमा सक्रिय भईसकेका छन् ।
‘वास्तवमा मलाई थाहा छैन धेरै कुराहरु, संविधानमा पाइन्छ भन्या पनि छैन, पाइन्न भनेको पनि छैन ।’ पत्रकारको प्रश्नको उत्तर दिँदै देउवाले भने ।
उनले मन्त्रीलाई फिर्ता बोलाएर नयाँ मन्त्री पठाउने विषयमा कुरा नभएको बताए । ‘वर्तमान सरकारबाट मन्त्री फिर्ता हुँदैनन् ।’ उनले भने ।
सभापति देउवाले संविधान संशोधनका लागि दुई तिहाई आवश्यक रहेकाले दुई तिहाइ जुटेपछि संविधान संशोधनको प्रक्रिया सुरु हुने बताए । त्यसका लागि दलहरुसँग छलफल भइरहेको उनको भनाइ छ ।
प्रतिक्रिया