‘भ्रष्टाचारको अन्त्य र सामाजिक सञ्जाल बन्द गर्ने सरकारको निर्णयविरुद्ध जेन-जी पुस्तासँग माओवादीको धारणा समान’

काठमाडौँ । प्रमुख प्रतिपक्ष दल नेकपा माओवादी केन्द्रले भ्रष्टाचारको अन्त्य र सामाजिक सञ्जाल बन्द गर्ने सरकारको निर्णयविरुद्ध जेन-जी पुस्तासँग माओवादीको धारणा समान रहेको जनाएको छ। भ्रष्टाचार र बेथितिविरुद्ध जेनजी पुस्ताले सोमबार गरेको प्रदर्शनमा १९ जनाको मृत्यु र ठुलो मात्रामा क्षति भएपछि प्रचण्ड निवास खुमलटारमा बसेको पदाधिकारीको आकस्मिक बैठकले यस्तो निष्कर्ष निकालेको हो ।

बैठकले प्रधानमन्त्री केपी ओलीको राजीनामा पनि मागेको छ । बैठक पछि माओवादी प्रवक्ता अग्नी सापकोटाद्वारा जारी विज्ञप्तिमा इतिहासकै कलङ्कको रूपमा भएको नरसंहारको जिम्मा सरकारले लिनुपर्ने उल्लेख गर्दै प्रधानमन्त्रीले तत्काल राजीनामा दिनुपर्ने जनाइएको छ । विज्ञप्तिमा प्रदर्शनका कममा मृत्यु भएका व्यक्तिहरूलाई सहिद घोषणा गर् माग गर्दै भोलि (मंगलबार साँझ) देशभरका सबै स्थानीय तहहरूमा श्रद्धाञ्जली सभा आयोजना गर्न निर्णय भएको उल्लेख गरिएको छ ।

बर्बर दमनबाट मारिएकाहरु प्रति श्रद्धाञ्जली व्यक्त गर्दै विज्ञप्तिमा घाइतेहरूको शीघ्र उपचारको प्रबन्ध तथा स्वास्थ्य लाभको कामना गरिएको छ ।

माओवादीले घटनाको स्वतन्त्र, निष्पक्ष र न्यायिक छानबिन गर्न आयोग गठन गरी दोषीहरूलाई कडा कारबाही गर्न समेत माग गरेको छ । माओवादीको विज्ञप्तिमा जेन(जी पुस्ता र माओवादी केन्द्रबीच साझा अवधारणा भएकाले आगामी दिनमा कसरी अघि बढ्‌ने भन्ने विषयमा संवाद गर्न माओवादी केन्द्रले युवा पुस्ताका प्रतिनिधिहरूसँग अपिल गरेको छ ।