जेन जी प्रदर्शनका क्रममा भएको दुःखद घटनाप्रति प्रधानमन्त्री ओलीद्वारा गहिरो दुःख प्रकट

काठमाडौँ । प्रधानमन्त्री केपी शर्मा ओलीले जेनजी पुस्ताले आह्वान गरेको प्रदर्शनका क्रममा भएको दुःखद घटनाप्रति गहिरो दुःख प्रकट गरेका छन्। सोमबार राती एक वक्तव्य जारी गर्दै प्रधानमन्त्री ओलीले प्रदर्शनमा नागरिकको ज्यान गएको घटनाले आफूलाई मर्माहत बनाएको बताएका छन्।

उनले वक्तब्यमा सरकार जेनजी पुस्ताको मागप्रति संवेदनशील रहेको तर प्रदर्शनमा विभिन्न स्वार्थ समूहले घुसपैठ गर्दा तोडफोड र आगजनी जस्ता घटना भएको दाबी गरेका छन् । प्रदर्शनका आयोजक स्वयंले प्रदर्शन सफल भएको घोषणा गरी घर फर्कन आग्रह गरिसकेपछि घुसपैठियाहरुले संवैधानिक संस्थाका कार्यालयमा तोडफोड र आगजनी गरेको उनले जनाएका छन् । तोडफोड र आगजनीपछि राज्यको सम्पत्ति जोगाउन सरकारले कदम चाल्नुपर्ने स्थिति आएको प्रधानमन्त्रीको भनाई छ ।

‘सरकारले सामाजिक सञ्जाललाई रोक्ने नीति लिएको थिएन र छैन। अदालतको आदेशअनुसार सूचीकरण भए लगत्तै पुनः सञ्चालन हुने व्यवस्था गरिएको हो,’ उनले बक्तब्यमा भनेका छन् । ओलीले सामाजिक सञ्जालबारे पर्याप्त जानकारी अभाव र जेनजी पुस्ताको सोचबीचको अस्पष्टताले आजको अवस्था सिर्जना भएको उल्लेख गरेका छन् ।

दुर्घटनामा ज्यान गुमाएका नागरिकप्रति समवेदना व्यक्त गर्दै ओलीले मृतक परिवारलाई राहत र घाइतेलाई निःशुल्क उपचारको व्यवस्था गर्ने प्रतिबद्धता जनाएका छन् । साथै, घटनाको कारण र अवस्था विश्लेषण गर्न १५ दिनभित्र प्रतिवेदन बुझाउने गरी छानबिन समिति गठन गरिने पनि बक्तब्यमा जनाएका छन् ।