काठमाडौं। नेपाली कांग्रेसका सभापति शेरबहादुर देउवाले संघीय लोकतान्त्रिक गणतन्त्रात्मक व्यवस्थालाई अझ सुदृढ बनाउन सबैलाई आह्वान गरेका छन्।
संविधान दिवसको अवसरमा शुभकामना सन्देश जारी गर्दै देउवाले लोकतन्त्रको स्थापना र पुनःस्थापना गर्न ऐतिहासिक आन्दोलन, क्रान्ति, संघर्ष र बलिदानमार्फत संविधान निर्माण भएको उल्लेख गर्दैे संविधान नेपाली जनताको ऐतिहासिक उपलब्धि भएको बताएका छन्। देउवाले २०७२ सालमा जारी संविधानले मुलुकलाई संघीय, धर्मनिरपेक्ष, समावेशी र लोकतान्त्रिक गणतन्त्रको बाटोमा अघि बढाएको स्मरण गराएका छन्।
उनको भनाइमा संविधान दिवस मुलुकको सार्वभौमिकता, भौगोलिक अखण्डता, राष्ट्रिय एकता र लोकतान्त्रिक मूल्य मान्यताप्रतिको प्रतिबद्धताको दिन हो। देउवाले नेपालको संविधानले मुलुकलाई सामाजिक न्याय, समान अवसर, मानव अधिकार र विधिको शासनको आधारशिला रोजेको उल्लेख गर्दै संविधानले मार्गनिर्देशन गरेको लोकतान्त्रिक अभ्यासलाई अझै बलियो बनाउनुपर्नेमा जोड दिए।
सभापति देउवाले मुलुकमा हाल देखिएका विभिन्न चुनौती र असन्तुष्टिलाई सम्बोधन गर्न संविधानलाई नै आधार मानेर अघि बढ्नुपर्ने आवश्यकता औंल्याए। “समृद्ध नेपाल निर्माणका लागि संविधानको पूर्ण कार्यान्वयन, सामाजिक सद्भाव र एकतापूर्ण राष्ट्रिय भावना आवश्यक छ,” देउवाले भने।
संविधान दिवसको अवसरमा उनले शहीद, अग्रज नेताहरू र लोकतन्त्रका लागि संघर्ष गर्ने सम्पूर्ण योद्धाप्रति श्रद्धा अर्पण गर्दै मुलुकको उज्ज्वल भविष्य निर्माणमा सबै एकताबद्ध हुनुपर्नेमा जोड दिए।
प्रतिक्रिया