प्रधानमन्त्री सुशीला कार्कीले आज राष्ट्रका नाममा सम्बोधन गर्ने

काठमाडौं । प्रधानमन्त्री सुशीला कार्कीले आज साँझ ६ बजे राष्ट्रका नाममा सम्बोधन गर्ने भएकी छन् । प्रधानमन्त्री तथा मन्त्रिपरिषद्को कार्यालयका अनुसार सम्बोधन अघि दिउँसो ४ बजे मन्त्रिपरिषद्को बैठक बस्ने कार्यतालिका तय गरिएको छ ।

‘जेनजी’ आन्दोलनपछि गठित अन्तरिम सरकारको नेतृत्व गरिरहेकी कार्कीले पहिलो पटक राष्ट्रलाई सम्बोधन गर्न लागेकी हुन् । गत भदौ २७ गते पूर्वप्रधानन्यायाधीश कार्की अन्तरिम सरकारको प्रधानमन्त्रीमा नियुक्त भएकी थिइन् ।

भदौ २३ र २४ गते भएको जेनजी आन्दोलनकै पृष्ठभूमिमा बनेको अन्तरिम सरकारले प्रतिनिधिसभा विघटन गर्दै आगामी फागुन २१ गते निर्वाचनको घोषणा गरिसकेको छ । कार्की नेतृत्वको सरकारको प्राथमिक कार्यभार भने निर्धारित समयभित्रै निर्वाचन सम्पन्न गर्नु हो ।