पूर्व राजनीतिक पदाधिकारीहरूले गर्न थाले सरकारी गाडी फिर्ता

काठमाडौं । सरकारले मितव्ययिता अपनाउने भनेर पूर्व राजनीतिक पदाधिकारीहरूको समेत गाडी फिर्ता गराउने निर्णय गरेसँगै प्रर्व राजनीतिक पदाधिकारीहरुले सुविधाको गाडी फिर्ता गर्न थालेका छन् ।

विघटित प्रतिनिधि सभाका १६ जना पदाधिकारीले सुविधा वापत्त लिएको गाडी फिर्ता गरेको संसद् सचिवालयले जनाएको छ । १२ वटा विषयगत समितिका सभापति र चार जना प्रमुख सचेतक र सचेतकले गाडी फिर्ता गरेको संसद् सचिवालयको सवारी शाखा प्रमुख प्रदीप नेपालले जानकारी दिए ।

प्रतिनिधि सभा अन्तर्गत १० वटा विषगत समिति रहेका छन् । नेपालका अनुसार संयुक्त दुई वटा समितिको सभापतिमा समेत प्रतिनिधि सभा सदस्य नै थिए । उनीहरू सबैले सुविधा वापत्त लिएको गाडी फिर्ता गरेका हुन् ।

नेकपा एमाले र नेकपा माओवादी केन्द्रका प्रमुख सचेतक र सचेतकले पनि गाडी फिर्ता गरेका छन् । कांग्रेसका प्रमुख सचेतक र सचेतकको गाडी भने जेन जी प्रदर्शनका क्रममा जलेको थियो ।

गच भदौ २४ गते सिंहदरवारमा आगलागी हुँदा कांग्रेस र एमालेको संसदीय दलको कार्यालय समेत जलेकोमा एमाले र माओवादीका सचेतकहरुको गाडी सिंहदरवार बाहिर रहेको तर कांग्रेसका प्रमुख सचेतक र सचेतकको गाडी सचिवालय परिसरमै रहेको बताइएको छ ।