काठमाडौं । नेपाली कांग्रेसका पूर्वमहामन्त्री डा। शशांक कोइरालाले मुलुक अहिले इतिहासकै सबैभन्दा विषम परिस्थितिमा रहेको बताएका छन् ।
बडादसैँ–२०८२ का अवसरमा शुभकामना दिँदै उनले यस्तो विषम अवस्थाबाट पार पाउन आपसी सद्भाव, सहिष्णुता र एकतासहितको सुझबुझपूर्ण निर्णय आवश्यक भएको बताएका छन् ।
कोइरालाले कांग्रेसभित्र अझै बलियो एकता अपरिहार्य रहेको उल्लेख गर्दै भनेका छन, “बलियो र एकताबद्ध कांग्रेसले नै विगतमा चुनौतीलाई अवसरमा बदल्दै मुलुकलाई निकास र विकास दिएको छ, अहिले पनि त्यही बाटो अपनाउनुपर्छ ।”
उनले जनताका लामो संघर्ष, त्याग र बलिदानबाट प्राप्त संघीय लोकतान्त्रिक गणतन्त्रको आधार संविधानमाथि प्रहार भएको र प्रतिनिधिसभा विघटनजस्तो कदम उठाइएकाले संविधान जोगाउने जिम्मेवारी कांग्रेसमा आएको स्पष्ट पारेका छन्।
डा। कोइरालाले सामाजिक एकता र सद्भाव नेपाली समाजको विशेषता भएको उल्लेख गर्दै अहिलेको अस्थिरता र प्रतिकूलताबाट निस्कन संवाद, संयम र आपसी एकतामात्र विकल्प रहेको बताए । “त्यसले नै शान्ति, सुशासन र समुन्नतिको बाटोमा देशलाई अघि बढाउँदै नेपाललाई सभ्य, सुखी र सम्पन्न राष्ट्रमा रूपान्तरण गर्न सक्छ,” उनले शुभकामना सन्देशमा भनेका छन् ।
उनले हालै भदौ २३ र २४ गते देशभर भएका प्रदर्शन र विनाशकारी घटनाले यस वर्षको दसैँ फरक परिवेशमा मनाउनुपर्ने अवस्था ल्याएको भन्दै लोकतान्त्रिक आन्दोलनका धरोहर बनेका ऐतिहासिक निवास तथा आश्रमहरू नष्ट भएकोमा गहिरो दुःख व्यक्त गरे । विराटनगरस्थित कृष्णप्रसाद कोइरालाको घर, गणेशमान सिंहको चाक्सीबारी निवास र कृष्णप्रसाद भट्टराई स्मृतिको बाँडेगाउँस्थित आश्रममाथि भएको आगजनी प्रजातान्त्रिक इतिहासकै साझा सम्पत्तिमाथिको प्रहार भएको उनको भनाइ छ ।
डा. कोइरालाले प्राप्त उपलब्धिहरूको रक्षा गर्दै मुलुकलाई आर्थिक समृद्धिको मार्गमा अघि बढाउन सबै तहबाट जिम्मेवारीपूर्वक भूमिका निर्वाह गर्नुपर्ने आह्वानसमेत गरेका छन् ।
प्रतिक्रिया