काठमाडौं । नेपालले संयुक्त अरब इमिरेट्स (यूएई) मा जारी जार युनिटी कप टी-२० क्रिकेट शृङ्खलामा उपाधि जितिसकेको छ । सोमबार राति शारजाह क्रिकेट मैदानमा भएको दोस्रो खेलमा वेस्ट इन्डिजलाई ९० रनले पराजित गर्दै नेपालले एक खेल अगावै सिरिज २-० ले आफ्नो पक्षमा पारेको हो ।
यसअघि पहिलो खेलमा पनि नेपालले वेस्ट इन्डिजलाई १९ रनले हराउँदै ऐतिहासिक जित निकालेको थियो । दोस्रो खेलमा नेपालले दिएको १७४ रनको लक्ष्य पछ्याउँदै वेस्ट इन्डिज १७.१ ओभरमै ८३ रनमा समेटिएको थियो ।
एक खेल अगावै उपाधि जितेको नेपाल अब सिरिजलाई ‘क्लिन स्वीप’ गर्ने लक्ष्यसहित मंगलबार राति ८:१५ बजे हुने फाइनल भिडन्तमा वेस्ट इन्डिजसँग मैदानमा उत्रिनेछ ।
वेस्ट इन्डिजका कप्तान अकिलले नेपाललाई धेरैले कमजोर ठाने पनि वास्तवमा खेल्न कठिन रहेको स्वीकार गरेका छन् । लगातार दुई जितले उत्साहित नेपाल तेस्रो जित निकाल्दै ऐतिहासिक सिरिजलाई अविजित रुपमा समाप्त पार्न चाहन्छ भने वेस्ट इन्डिज भने सान्त्वना जित निकाल्न आतुर छ ।
प्रतिक्रिया