बुटवल । बुटवल उपमहानगरपालिकाले नेपालीहरूको महान चाड तिहार तथा छठ पर्वको अवसरमा नगर क्षेत्रमा प्लाष्टिकका फूलहरू बिक्री, वितरण र प्रयोग नगर्न नगरवासीलाई आग्रह गरेको छ ।
उपमहानगरपालिकाका नगर प्रमुख खेलराज पाण्डेयले हस्ताक्षर गरी जारी गरिएको सूचनामा भनिएको छ- “धार्मिक एवम् सांस्कृतिक पर्वको मौलिकता जोगाउन, वातावरणीय प्रदूषण नियन्त्रण गर्न र स्थानीय उत्पादनलाई प्रोत्साहन दिन सबैले स्वदेशी फूल तथा मालाको प्रयोग गर्नुपर्छ ।”
विज्ञप्तिमा भनिएको छ कि प्लाष्टिकका फूल माटोमा कुहिन नसक्ने भएकाले वातावरणमा दीर्घकालीन असर पुर्याउँछन् र यसले सहरको सौन्दर्यमा समेत नकारात्मक प्रभाव पार्छ । त्यसैले नगरवासीहरूले तीहार र छठजस्ता पर्वमा कृत्रिम फूलको सट्टा प्राकृतिक फूलको प्रयोग गरेर स्थानीय कृषक र उद्यमीलाई समेत सहयोग पुर्याउने अपेक्षा नगरपालिकाले गरेको छ ।
नगर प्रमुख पाण्डेयका अनुसार उपमहानगरपालिकाले वातावरणीय स्वच्छता र हरियाली प्रवर्द्धनलाई दीर्घकालीन लक्ष्यका रूपमा अघि सारेको छ । उनले भने, “हामीले वातावरण संरक्षण, स्थानीय उत्पादकको समर्थन र मौलिक संस्कृतिको जगेर्नालाई प्राथमिकता दिएका छौँ, त्यसैले सबै नगरवासीले यस अभियानमा साथ दिनु आवश्यक छ।”
उपमहानगरपालिकाले यस वर्षको तीहार र छठ पर्वलाई स्वच्छ, हरित र स्थानीय उत्पादनमा आधारित बनाउने लक्ष्यसहित ‘प्लाष्टिक फ्री बुटवल’ अभियानलाई सशक्त रूपमा अघि बढाइरहेको पनि जनाएको छ ।
प्रतिक्रिया