बुटवल । बुटवल उपमहानगरपालिकाअन्तर्गत लुम्बिनी बस टर्मिनल (नयाँ बसपार्क) को ठीक सामुन्ने रहेका भित्ताहरू बुटवलको इतिहास, संस्कृति, सम्पदा र गौरव झल्काउने आकर्षक भित्ते चित्रले सजिएका छन् । कलाकारहरूले जेठ ३० गतेदेखि तीन दिनसम्मको मेहनतमा भित्ताहरूलाई सौन्दर्य, इतिहास र पहिचानसँग जोड्ने काम गरेका हुन् ।
बुटवलको ऐतिहासिक, धार्मिक तथा सांस्कृतिक महत्वलाई चित्रमार्फत प्रस्तुत गरिएको भित्ते चित्रमा आदि मानव रामापिथेकसको बंगरा भेटिएको स्थल, नेपाल-अंग्रेज युद्धमा नेपाली सेनाले विजय हासिल गरेको जितगढी किल्ला, पुरानो बुटवलको नून साट्ने थलोदेखि आधुनिक बुटवलसम्मको विकास यात्रालाई समेटिएको छ ।
बुटवल उपमहानगरपालिकाको आयोजना तथा नेपाल व्यवसायिक कलाकार संघ रुपन्देहीको सहकार्यमा तयार गरिएका यी चित्रहरूले बुटवलको पहिचानलाई दृश्य माध्यमबाट प्रस्तुत गरेका छन् । यहाँ आउने जो-कोहीले चित्रमार्फत बुटवलको इतिहास र विकासक्रमबारे जानकारी प्राप्त गर्न सक्नेछन् ।
बुटवल उपमहानगरपालिकाका नगरप्रमुख खेलराज पाण्डेयले बुटवल बजार सौन्दर्यकरण अभियानअन्तर्गत हाललाई भुड्कीचोकदेखि सडक डिभिजन कार्यालयको गेटसम्म भित्ते चित्रलेखन गरिएको जानकारी दिए । उनले यस अभियानले बजारको सौन्दर्य बढाउनुका साथै स्थानीय कलाकारहरूको संरक्षण र प्रवर्द्धनमा महत्वपूर्ण योगदान पुग्ने विश्वास व्यक्त गरे ।
नगरप्रमुख पाण्डेयले आगामी दिनमा यस्ता कार्यक्रमलाई थप विस्तार गर्ने योजना रहेको बताउँदै भित्ते चित्रमार्फत बुटवलको ऐतिहासिक तथा सांस्कृतिक पहिचानलाई उजागर गर्न सहयोग पुग्ने बताए ।
नेपाल व्यवसायिक कलाकार संघ रुपन्देहीका अध्यक्ष दिलीप रसाइलीले उपमहानगरपालिकाको यस्तो पहलले शहरको सौन्दर्य अभिवृद्धिसँगै स्थानीय कलाकारहरूको प्रतिभा संरक्षण र प्रोत्साहनमा महत्वपूर्ण भूमिका खेलेको बताए ।
बुटवल उपमहानगरपालिका रोजगार प्रवर्द्धन शाखा प्रमुख अरबिन्द पाण्डेका अनुसार भित्ते चित्रलेखन कार्यमा स्थानीय २१ जना कलाकारहरूको सहभागिता रहेको थियो ।
फोटो फिचरसहित
प्रतिक्रिया