कञ्चनपुर । प्यालेस्टिनी लडाकु समूह ‘हमास’को नियन्त्रणमा रहँदा ज्यान गुमाएका कञ्चनपुरका स्थानीय विपिन जोशीको शव उनकै घर पुर्याइएको छ । नेपाली सेनाको एक टोलीले विपिनको शवलाई सोमबार राति करिब सवा ८ बजे धनगढी हुँदै भीमदत्त नगरपालिका–३, मालिकार्जुन टोलस्थित उनको घरमा पुर्याएको हो ।
सोमबार साँझ कञ्चनपुरको भीमदत्त नगरपालिका–३ स्थित विपिनको घरमा शव ल्याउँदा सयौँको संख्यामा उपिस्थित आफन्त र स्थानीय भक्कानिएका थिए ।
धनगढी उपमहानगरपालिकाको ‘महाप्रस्थान बाहन’ बाट काठको बाकसमा बन्द विपिनको शव आँगनमा झरेसँगै धेरैजनाले आँसु थाम्न सकेनन् ।
सोमबार लक्ष्मी पूजा तथा दीपावलीको दिन भए पनि विपिनको शव आउने भएपछि छिमेकीहरू दीपावली नै नगरी बसेका थिए । आज सो बस्तीमा कसैलेपनि दीपावली गरेनन् ।
दुई वर्षअघि सुदूरपश्चिम विश्वविद्यालयबाट कृषि विज्ञानमा स्नातक अध्ययन गरेर इजरायलमा ‘लर्न एण्ड अर्न’ कार्यक्रमअन्तर्गत ‘इन्टर्न’ गर्न गएकामध्ये दश जना नेपाली विद्यार्थी इजरायलमा हमासको आक्रमणमा परेका थिए।
हमासले फालेको ग्रिनेड समातेर हमासतिरै फालेका उनलाई सो समूहले बन्धक बनाएर लगेको थियो।
विपिनको अन्त्येष्टि मंगलबार गरिनेछ ।
प्रतिक्रिया