शेरबहादुर देउवा सिंगापुर जाँदै

काठमाडौं । नेपाली कांग्रेसका सभापति शेरबहादुर देउवा आज राति सिंगापुर प्रस्थान गर्दै छन् ।

देउवा पत्नि आरजु राणासहित थप उपचारका लागि राति ११ बजे सिंगापुर एयरलाइन्सको उडानमार्फत सिंगापुर जान लागेका हुन् ।

जेन जी आन्दोलनको दोस्रो दिन बूढानीलकण्ठस्थित निवासमा भएको आक्रमणपछि उनलाई मानसिक रूपमा समेत आघातमा परेको थियो। त्यसक्रममा सुरक्षाकर्मीले उद्धार गरी देउवा दम्पतीलाई सेनाको सैनिक अस्पताल, छाउनीमा पुर्‍याएका थिए, जहाँ देउवाको टाउकोमा १२ वटा टाँका लगाइएको थियो। ती टाँका समेत सिंगापुरमै निकाल्ने तयारी गरिएको बताइएको छ।

देउवाका छोरा, बुहारी र साला हाल सिंगापुरमै रहेका कारण उनले त्यहीँ उपचार गर्ने योजना बनाएका हुन् । सरकारले उनको विदेश यात्रा रोक्ने कुनै तयारी नगरेको स्रोतले जानकारी दिएको छ।

देउवाले पार्टीको कार्यबाहक जिम्मेवारी पूर्णबहादुर खडकालाई सुम्पेर सक्रिय राजनीतिबाट विश्राम लिने तयारी गरेका छन्।