काठमाडौँ । विप्लव नेतृत्वको नेपाल कम्युनिस्ट पार्टीले जनसभा र प्रदर्शन सहितको कार्यक्रम तय गरेको छ । असोज २५ देखि ३० गते केन्द्रीय कार्यालय कपिलवस्तुमा बसेको केन्द्रीय समितिको विशेष बैठकले जनसंघर्षका कार्यक्रम घोषणा गरेको हो ।
नेकपाले देशब्यापीरुपमा बिभिन्न बिरोधका कार्यक्रमहरु गर्दै कात्तिक २० गते काठमाडौंमा सभा गर्ने सम्मका जनसंघर्षका कार्यक्रमहरू घोषणा गरेको छ । बैठकको निर्णयअनुसार कात्तिक १३ गतेसम्म भित्ते लेखन गर्ने, छ । बैठकले कात्तिक १५ गते देशव्यापी मसाल जुलुस प्रदर्शन गर्ने, कात्तिक १७ गते देशव्यापी विरोध प्रदर्शनसहित कोणसभा गर्ने र कात्तिक २० गते काठमाडौँमा बृहत् जनसभा गर्ने निर्णय गरेको छ ।
कार्यक्रमको मुख्य नाराहरुमा सर्वपक्षीय अन्तरिम सरकार गठन गर, भ्रष्टाचारको निष्पक्ष छानबिन गर, उच्चस्तरीय छानबिन आयोग गठन गर, भ्रष्टाचारीहरूलाई कारबाही गर्न विशेष न्यायालय गठन गर, अग्राधिकारसहितको समाजवाद निर्माण गर, दलाल प्रकृतिका गैरसरकारी संस्थाहरू खारेज गर, जेनजीमाथि भएको दमनको निष्पक्ष छानबिन गर, युवाहरूका लागि रोजगारीको ग्यारेन्टी गर लगायतका रहेका छन् ।
२० गते काठमाडौंमा हुने सभालाई महासचिव नेत्रविक्रम चन्द विप्लवले सम्बोधन गर्ने नेकपाका नेता सन्तोष बुढामगरले जानकारी दिए । काठमाडौँमा आयोजना हुने जनसभामा सहभागी हुन स्वाधीनता र समाजवादका पक्षधरहरूलाई महासचिव विप्लवले आह्वान समेत गरेका छन् ।
‘नेपाललाई अरूले होइन हामी आफैँले फेर्ने हो । अरूले होइन नेपालीले नै चलाउने हो । जब भ्रष्ट, कमिसनखोर, तस्कर, दलाल, परजीवीहरू समाप्त हुनेछन् देशले आत्मसम्मानसहित उन्नति हासिल गर्नेछ । स्वाधीनता र समाजवादका पक्षमा उभिन कात्तिक २० गते काठमाडौँमा भेटौँ साथीहरू’, उनले सामाजिक सञ्जालमा लेखेका छन् ।
प्रतिक्रिया