पाल्पामा ईभी भ्यान दुर्घटना हुँदा तीन जनाको मृत्यु

पाल्पा । पाल्पाको रैनादेवी छहरामा भएको भ्यान दुर्घटनामा तीन जनाको ज्यान गएको छ । सदरमुकाम तानसेनदेखि करिब २० किलोमिटर पश्चिमतर्फ पर्ने रैनादेवी छहरा गाउँपालिका-४, पिपलभञ्ज्याङमा दुर्घटना भएको हो ।

इलाका प्रहरी कार्यालय मुझुङका अनुसार, लु प ०००१ ज ००९१ नम्बरको ईभी भ्यान दुर्घटनामा परि चालकसहित तीन जनाको घटनास्थलमै मृत्यु भएको हो । मृतकहरूको पहिचान भने अहिलेसम्म हुन सकेको छैन ।

प्रहरीका अनुसार, उक्त भ्यान बुटवलबाट छहरा-मेहलढापतर्फ जाँदै गर्दा बिहान साढे १० बजे सडकबाट करिब १ हजार ५ सय मिटर तल खसेको हो ।

स्थानीयवासीका अनुसार, भ्यान छहरा बजारबाट १० बजे मेहलढापतर्फ प्रस्थान गरेपछि दुर्घटनाको जानकारी साढे १ बजेतिर मात्र प्राप्त भएको हो ।

भ्यानले बुटवलबाट आएका यात्रुहरूलाई छहरा बजारमा झारेपछि मेहलढापतर्फ गएको थियो । प्रहरीका अनुसार, मृतकहरूको शवलाई उद्धार गरी अस्पताल पठाइएको छ र थप विवरण संकलन भइरहेको छ ।