काठमाडौं । हङकङ सुपर सिक्सेस क्रिकेट प्रतियोगिताको आइतबारको खेलमा नेपाल यूएईसँग ४३ रनले पराजित भएको छ ।
यूएईले दिएको १३० रनको लक्ष्य पछ्याउने क्रममा नेपालले पूरै ६ ओभर खेल्दै चार विकेटको क्षतिमा ८६ रन मात्र बनाउन सक्यो । नेपालका लागि आदिल आलमले ३२ रन र सन्दीप जोराले नटआउट ३१ रनको योगदान दिए ।
यसअघि टस हारेर पहिले ब्याटिङ गरेको यूएईले निर्धारित ६ ओभरमा चार विकेट गुमाउँदै १२९ रन बनाएको थियो । यूएईका निलांश केसवानीले विस्फोटक प्रदर्शन गर्दै १५ बलमा १० छक्का र तीन चौकासहित ७३ रनको पारी खेले ।
नेपालका लागि राशिद खानले दुई विकेट लिँदा, लोकेश बम र रुपेश सिंहले एक-एक विकेट हात पारे ।
हङकङ सिक्सेसमा नेपालले पाँच खेल खेलेर एउटा मात्र जित हात पारेको छ । शनिबार भारतलाई पराजित गरेको नेपाल अफगानिस्तान, दक्षिण अफ्रिका, श्रीलंका र यूएईसँग भने हार ब्यहोरेको छ ।
प्रतिक्रिया