काठमाडौं । सरकारले राजदूतहरू फिर्ता बोलाउने निर्णय यथास्थितिमा राख्न सर्वोच्च अदालतले जारी गरेको अन्तरिम आदेशको अवज्ञा भएको आरोपमा प्रधानमन्त्री सुशीला कार्कीविरुद्ध अवहेलना मुद्दा दर्ता गरिएको छ।
सर्वोच्च अदालतको पूर्वप्रधानन्यायाधीश समेत रहेकी कार्कीविरुद्ध अधिवक्ता प्रेम सिलवालले दायर गरेको निवेदनको पेसी मंसिर ७ गतेका लागि तोकिएको छ।
जेनजी आन्दोलनपछि गठन भएको कार्की सरकारले अघिल्लो सरकारले नियुक्त गरेका ११ देशका राजदूतलाई फिर्ता बोलाउने निर्णय असोज ३० गते गरेको थियो।
उक्त निर्णयविरुद्ध परेको रिटमाथि सुनुवाइ गर्दै न्यायाधीशद्वय सारंगा सुवेदी र श्रीकान्त पौडेलले कात्तिक १६ गते संयुक्त इजलासबाट सरकारलाई निर्णय कार्यान्वयन नगरी यथास्थितिमा राख्न अन्तरिम आदेश जारी गरेका थिए।
तर आदेश जारी भएको भोलिपल्टै प्रधानमन्त्री कार्की स्वयं मातहत रहेको परराष्ट्र मन्त्रालयले सम्बन्धित राजदूतलाई फिर्ता बोलाएर मन्त्रालयमा हाजिर हुन निर्देशन दिएको थियो। सो निर्देशनअनुसार राजदूतहरू मन्त्रालयमा उपस्थित भई फर्किएका छन्। तीमध्ये चार जनाले राजीनामा दिइसकेका छन् ।
प्रतिक्रिया