काठमाडौं । नेकपा (एमाले) निकट नेशनल भोलिन्टियर्स फोर्सले शुक्रबार काठमाडौंको बबरमहल क्षेत्रमा शक्ति प्रदर्शनसहित मार्चपास गरेको छ।
एमाले अध्यक्ष केपी शर्मा ओलीद्वारा फोर्सको केन्द्रीय कमाण्ड घोषणा अघि युवा समूहले गरेको यो प्रदर्शनलाई नेता महेश बस्नेतले नेतृत्व गरेका छन् ।
मार्चपासका क्रममा बोल्दै बस्नेतले ‘जेनजी’ को नाममा भएको गतिविधिमा कुनै पनि प्रकारको अवरोध आए प्रतिरोध गर्न तयार रहने चेतावनी दिए ।
‘जेनजीका नाममा जहाँ अवरोध, त्यहीं प्रतिरोध,’ बस्नेतले भने, ‘जेनजीहरूसँग हामी निरन्तर सम्पर्कमा छौँ। तर उनीहरूको नाम र ब्यानर प्रयोग गरेर विभिन्न तत्वहरू सक्रिय भएको देखिन्छ।’
उनले वास्तविक जेनजी पुस्ताका माग पूरा गर्ने शक्ति एमाले नै भएको दाबी समेत गरे । जेनजी आन्दोलनका क्रममा घाइते तथा शहीद बनेकाहरूलाई न्याय दिलाउन प्रतिनिधिसभा पुनःस्थापना आवश्यक रहेको उनले जिकिर गरे ।
बस्नेतका अनुसार फोर्सलाई वडा, पालिका र टोल तहसम्म विस्तार गर्ने योजना छ । राष्ट्रिय सम्पत्तिमाथि आगजनी वा तोडफोडजस्ता गतिविधि दोहोरिन नदिन फोर्स पेशागत संघ–संस्थासँग पनि सहकार्यमा जाने उनले बताए ।
प्रतिक्रिया