काठमाडौं । दुर्गा प्रसाईंको राष्ट्र, राष्ट्रियता, धर्म, संस्कृति र नागरिक बचाउ महाअभियानले भोलिदेखि गर्ने भनिएको नेपाल बन्द, अनिश्चितकालीन आम हड्तालका कार्यक्रमलाई फिर्ता लिएको छ।
शनिबार बालुवाटारमा सरकार र अभियानका प्रतिनिधिबीच भएको वार्तामा भएको सहमति अनुसार आम हड्तालका कार्यक्रम फिर्ता भएको हो । वार्तामा महाअभियानले प्रस्तुत गरेका २७ बुुँदे मागबारे समाधानका लागि निरन्तर संवाद अघि बढाउने दुबै पक्षबीच सहमति भएको बताइएको छ ।
हालको शान्ति–सुरक्षा स्थिति तथा नागरिक चासोलाई पहिलो प्राथमिकतामा राख्दै महाअभियानले उठाएका मुद्दाहरू सम्बोधन गर्न प्रधानमन्त्रीको तर्फबाट प्रतिबद्धता जनाएपछि कार्यक्रम फिर्ता भएको हो । सरकारको तर्फबाट निरन्तर वार्ता, छलफल र सहजीकरण प्रक्रियामा रहने प्रतिबद्धता आएको सहमति पछि जारी प्रेस विज्ञप्तिमा उल्लेख गरिएको छ । महाअभियानको तर्फबाट सचिव ्िरमदीप लिम्बु र प्रधानजमन्त्रीका मुख्य सल्लाहकार अजयभद्र खनालले हस्ताक्षर गरेको विज्ञप्तिमा महाअभियानले प्रस्तुत गरेका २७ बुुँदे मागबारे समाधानका लागि निरन्तर संवाद अघि बढाउन सरकार सहमत भएको उल्लेख छ ।
वार्तामा महाअभियानतर्फबाट सचिव प्रेमदीप लिम्बुको नेतृत्वमा अधिवक्ता विनोदमणि भट्टराई, लवण न्यौपाने र दुर्गा प्रसाईका छोरा डा. निराजन प्रसाई सहभागी थिए।
सरकारतर्फ गृहमन्त्री ओमप्रकाश अर्याल, प्रधानमन्त्रीका मुख्य सल्लाहकार अजयभद्र खनाल तथा सल्लाहकार गोविन्दनारायण तिमिल्सिनालगायतको उपस्थिति रहेको थियो।
प्रतिक्रिया