काठमाडौं । प्रचण्ड नेतृत्वको माओवादी केन्द्रसँग छुट्टिएर प्रगतिशील लोकतान्त्रिक पार्टीको नेता बनेका जनार्दन शर्माले परम्परागत ठूला दलहरू देशलाई परिवर्तन गर्न असफल रहेको आरोप लगाएका छन् ।
पार्टी घोषणासभालाई सम्बोधन गर्दै शर्माले कांग्रेस, एमाले र माओवादी केन्द्र आफ्ना–आफ्ना समयका परिवर्तनकारी शक्ति भए पनि सत्तामा पुगेपछि आफ्नो क्रान्तिकारी चरित्र जोगाउन नसकेर इतिहासमै असफल सिद्ध भएको बताए। उनका अनुसार, विकासको गति रोकिँदा देश भ्रष्टाचार, नातावाद, कृपावाद, यथास्थिति र दण्डहीनताबाट ग्रसित बन्दै गएको छ।
शर्माले दशकौँसम्म सत्ताको मुख्य केन्द्रमा बसेका तीन दलले जातीय, क्षेत्रीय, लैंगिक तथा वर्गीय विभेद जस्ता उत्पीडनको मूल समस्यालाई सम्बोधन गर्न नसकेको आरोप लगाए। उनले विकासका लागि आवश्यक नीतिगत तथा प्रणालीगत पुनःसंरचना नगरी मौजुदा संरचनाको दुरुपयोग गरेर मुलुकलाई बर्बादीतर्फ धकेलिएको दाबी गरे।
संविधान निर्माण प्रक्रियालाई दलीय स्वार्थको एजेन्डा बनाइएकै कारण जनताको वास्तविक म्यान्डेट सम्बोधन हुन नसकेको उल्लेख गर्दै उनले राज्यका अंगहरूको अत्यधिक राजनीतिकरणले शासन प्रणाली नै कमजोर भएको बताए।
नयाँ पार्टी गठनको औचित्य प्रस्तुत गर्दै शर्माले प्रगतिशील लोकतान्त्रिक पार्टी देशलाई भ्रष्टाचारमुक्त, सामाजिक न्याययुक्त र भिजनयुक्त शासनतन्त्रमा लैजाने वैकल्पिक राजनीतिक शक्ति बन्ने दाबी गरे।
प्रतिक्रिया