काठमाडौं । नेकपा (माओवादी केन्द्र) र नेकपा (एकीकृत समाजवादी)बीचको पार्टी एकताप्रति असन्तुष्ट रहेका माओवादी केन्द्रका उपमहासचिव जनार्दन शर्माले आज विशेष पत्रकार सम्मेलन गर्न लागेका छन् ।
शर्माले ललितपुरको बखुण्डोलस्थित सत्कार क्याफेमा दिउँसो २ः३० बजे पत्रकार सम्मेलन गर्ने कार्यक्रम तय गरेका हुन् । माओवादी केन्द्रको केन्द्रीय समिति बैठक बहिष्कार गर्दै उनले पत्रकार सम्मेलन गर्न लागेका हुन् ।
माओवादी केन्द्र महाधिवेशन आयोजक समितिको बैठक आज (कार्तिक १८) दिउँसो १ बजे प्रज्ञा प्रतिष्ठान, कमलादीमा बस्दै छ । सो बैठकले नेकपा (एकीकृत समाजवादी) सहित नौ वामदलबीचको एकता प्रस्ताव अनुमोदन गर्ने तयारी गरेको छ ।
तर, उपमहासचिव शर्माले भने एकता प्रक्रियाप्रति असहमति जनाउँदै यसलाई तत्काल रोक्नुपर्ने धारणा अघि सार्दै आएका छन् । उनले यसअघि नै उक्त एकता प्रक्रियामा सहभागी नहुने र पार्टी अध्यक्ष पुष्पकमल दाहाल ‘प्रचण्ड’ सँग अलग हुने घोषणा गरिसकेका छन् ।
प्रतिक्रिया